Gobièrnu di Kòrsou ta sigui ku preparashonnan pa ku krísis i kalamidat. - Informashon tokante Gobièrnu di Kòrsou Bo opinion

Notisia

Gobièrnu di Kòrsou ta sigui ku preparashonnan pa ku krísis i kalamidat.

Geplaatst op 28 May 2018 dor di Ministerio Hustisia

Den kumplimentu ku e lei pa kalamidat, e ‘Landsverordening Rampenbestrijding’ i e plan di kalamidat di Gobièrnu, koleganan di ‘Emergency Support Function 4’ (ESF 4) ku ta enfoká riba e parti di ‘redding i fysieke veiligheid’ ku tambe ta forma parti di e ‘Rampenbestrijdingsorganisatie’ a organisá un dia informativo pa e organisashonnan ku ta forma huntu ESF 4. E dia aki a ser organisá den kuadro di sigui prepará pa e diferente krísis i kalamidat ku por asotá Kòrsou pero tambe ku mira riba e temporada di orkan binidero.

ESF 4 ta konsistí di e siguiente organisashonnan: CITRO (Citizens Rescue Organization), Warda Kosta i UO Brandweer & Rampenbestrijding Curacao (Brantwer Kòrsou). Brantwer Kòrsou ta fungi komo kordinadó di ESF 4. E tarea di Brantwer Kòrsou ta enfoká riba seguridat i reskate den e komunidat di Kòrsou durante un krísis òf kalamidat p.e. un kandela grandi òf ora tin daño material grandi. Brantwer Kòrsou ta buta énfasis riba traha di un manera profeshonal, proaktivo, preventivo i represivo pa mitigá e efektonan ku un kalamidat por tin na Kòrsou.
CITRO ta enkargá ku e tarea di reskate riba laman di personanan. Warda Kosta su tareanan den kuadro di kalamidat por ser kategorisá komo ‘Search & Rescue’.

Durante di e dia informativo aki koleganan di Direktorado di Kòntròl di Riesgo i Maneho pa kalamidat tambe a asistí na e seshon di informashon. E direktorado den ministerio di Asuntunan General, tin komo tarea pa hasi tur lokual mester pa garantisá i salbaguardiá, bida, kontinuidat sosial, medio ambiente i vienes di pais Kòrsou, na un manera efektivo i efisiente promé, durante i despues di un krísis òf kalamidat.

Durante di e dia aki a kompartí informashon den ESF 4 i nan ròl durante un krísis òf kalamidat i a demostrá e diferente ekipo i materialnan ku tin disponibel den kuadro di ‘rampenbestrijding’. E koleganan konserní a risibí un rekorido na e lokalidat di Brantwer Kòrsou na Mundu Nobo, Warda Kosta na Parera i a terminá e dia serka na Carcasbaai CITRO.

Tabata un dia hopi informativo kaminda den laso nan estrecho e diferente organisashonnan gubernamental i no gubernamental ta sigui traha huntu den estrecho koperashon promé, durante i despues di un krísis òf kalamidat.

 

Ministerio konserní