Publiká riba 29 Yüli 2021
WILLEMSTAD – Empleadonan públiko ku a apliká pa retiro boluntario (VVU) a sigui un webinar, organisá spesialmente pa nan ku ta baha pronto ku penshun.
Durante un seshon interaktivo ku a tuma lugá riba djabièrnè 23 di yüli último, mas o ménos 150 ámtenar a risibí informashon balioso pa nan futuro.
Representante di SVB, sr. Luis Coffie a duna un splikashon amplio riba seguro básiko i servisionan di penshun. Otro tópiko interesante presentá pa sra. Ersilia de Lannooy, tabata planifikashon finansiero; kiko pa hasi i kiko pa evitá pa un futuro sin prekupashon finansiero. Na final e partisipantenan a haña ideanan di aktividatnan pa hasi den nan tempu liber serka sra. Militza Riedel.
E totalidat tabata presentá den e tema di relahá. E partisipantenan a biaha di un forma virtual pa London, Cuba i a regresá Kòrsou pa klousurá ku un tremendo ‘happy hour’ riba músika ‘live’ di Ike Jesurun.
Den e dos edishonnan anterior ya a bini dilanti informashon tokante e lei di VVU, seguro sosial i penshun.
Di e forma aki Gobièrnu, pa medio di su departamento di Rekurso Humano (HRO) di Ministerio di Maneho di Gobernashon, Planifikashon i Servisio Públiko ta sigui kumpli ku su responsabilidat komo dunadó di trabou pa ekipá e personal pendiente pa baha ku penshun.
