Publiká riba 04 Mart 2020
Willemstad – Den kumplimentu ku e lei pa kalamidat, e ‘Landsverordening Rampenbestrijding’ i e plan di kalamidat di Gobièrnu, direktorado di Kontrol di Riesgo i Maneho pa Kalamidat a organisá un seshon di informashon pa koleganan di e ‘Rampenbeheersingsorganisatie’ tokante Corona vírùs.
Dr. Izzy Gerstenbluth, epidemiólogo afiliá na e departamento di Epidemiologia di Ministerio GMN, a duna splikashon di kiko e Corona vírùs ta, kua ta e medidanan di prekoushon ku por tuma, pero tambe e la enfoká riba medidanan ku Ministerio di GMN ta tuma pa kontrolá e situashon aki. Medidanan di prekoushon ku tur hende por tuma ta ampliamente spliká riba entre otro website di gobièrnu www.gobiernu.cw.
E ‘Rampenbeheersingsorganisatie’ (RBo) ta e organisashon na Kòrsou ku ta enkargá ku e kordinashon di un krísis òf kalamidat i alabes ta sòru pa mitigá e efektonan ku esaki por tin. E RBo ta konsistí di 9 Emergency Support Functions (ESF) i ‘liaisons’, ku ta diferente organisashon ku ta traha huntu pa mitigá e efektonan ku un krísis òf kalamidat por tin. Miembronan di e RBo ta e.o. Aqualectra, ‘Bureau Telecommunicatie & Post’, Ministerio VVRP, KPC, Ministerio GMN, Ministerio SOAW, DC&V, WJZ, Meteo, Krus Kòrá Kòrsou i Boluntarionan di Emergency Operation Center.
Sr. Lesley Fer, komo Kordinadó nashonal di krísis i desaster, a enfoká riba e diferente plannan ku tin i e ròl di e ‘Rampenbeheersingsorganisatie’ den dado kaso si lo tin ku aktua di bèrdat i mester duna ayudo pa mitigá e efektonan ku Corona vírùs por tin riba nos komunidat. Ministerio di GMN, ku tambe ta forma parti di e ‘Rampenbeheersingsorganisatie’, ta sigui den kontakto estrecho ku tur partner konserní. Tur kolaborashon ta keda palabrá teniendo na kuenta tur posibel senario na momentu ku detektá asta un kaso sopechoso.
Importante ta pa sigui informashon ku Ministerio di GMN ta proveé i sigui e website di Gobièrnu di Kòrsou www.gobiernu.cw pa notisia ofishal tokante desaroyo di Corona vírùs.
