Publiká riba 05 Yüni 2021
Willemstad, Gobièrnu di Kòrsou, ku a keda representá pa Minister Steven Croes i algun di e miembronan di tim di krísis a invitá e grupo di farándula lokal pa papia pa yega na algun palabrashon kon na un manera responsabel por habri farándula bèk i limitá kontagio di COVID-19 na Kòrsou.
Durante e reunion aki, vários doño di banda, diskotèk, promotor i artista a papia ku Minister Croes, Izzy Gerstenbluth, hefe di e Departamento Epidemiólogo, Stella van Rijn, Presidente di TAC i Maharo Isenia, Direktor di Komunikashon di Gobièrnu pa yega na proposishonnan konkreto riba e posibilidat pa habri farándula kompleto, pero bou di kondishonnan ku ta regla e.o. kontrol na entrada, registrashon, protokòlnan pa e fiestanan, e tema di tèstmentu òf bakunashon, e dia pa kuminsá i tambe introdukshon di un App.
E reunion a kana den un esfera ameno i a yega na puntonan konkreto ku djaluna próksimo Gobièrnu di Kòrsou ta bai anunsiá. Tin algun akshon mas interno ku Gobièrnu tin ku kaba di regla ku e.o. e timnan di kontrol i tambe preparashonnan nesesario pa tur aktividat por kana nèchi limitando e riesgo ku COVID ta plama na Kòrsou.
