Gobièrnu i sektor turístiko huntu ke logra yega na re-adaptashon di konseho di biahe pa Kòrsou. - Informashon tokante Gobièrnu di Kòrsou Bo opinion

Notisia

Gobièrnu i sektor turístiko huntu ke logra yega na re-adaptashon di konseho di biahe pa Kòrsou.

Geplaatst op 09 December 2020 dor di Ministerio Asuntunan General i Promé Minister

Willemstad – Gobièrnu di Kòrsou ta konsiente ku e konseho di biahe negativo ku Gobièrnu di Hulanda a duna pa Kòrsou, tin un impakto bastante grandi riba nos sektor di turismo i hospitalidat. Ta trata aki di un sektor kaminda miles di hende den nos pais ta empleá, sea dirèkt den hotèl i apartamentonan, òf tambe relatá na vários servisio i produkto turístiko indirekto ku nos ta brinda e sektor i bishitantenan di nos pais.

Pa e motibu aki, Gobiernu tin total komprenshon pa e reakshonnan ku e desishon di Hulanda ta trese kuné. Sinembargo, komo pais i komo komunidat nos mester enfoká nos energia na e momentunan aki riba rekuperashon i huntu pone man na obra pa kambia e desishon di Hulanda. 

Pa Kòrsou por kambia e desishon di Hulanda i bini bèk den kódigo hel komo konseho di biahe, riba término kòrtiku, ta rekerí lo siguiente:

  • Na promé lugá, baha e kantidat di kontagio di COVID-19. Ta trata aki spesífikamente ku nos mester baha e kantidat di kasonan nobo positivo pa dia. Un di e motibunan prinsipal ku a kondusí na e desishon di Hulanda tabata e echo ku e kantidat di kasonan positivo diario a subi konsiderablemente den e último dos simannan.
  • Huntu ku esaki, nos lo mester ban enfoká pa renforsá mihó siguimentu di e instrukshonnan di higiena i otro medidanan ku a keda instituí ku e meta pa baha e kantidat di kontagio aki. Aparte di e kantidat di kontagio aktual, Hulanda ta konsiderá tambe kua ta e medidanan ku e pais a tuma pa bringa e oumento den kontagionan i kon komunidat ta reakshoná riba esakinan.
  • Meskos ku otro pais i isla den nos region (por ehèmpel Boneiru) nos tin ku mustra ku nos por tin resultadonan faborabel den e lucha kontra Covid-19. Hulanda ta wak i kompará esaki ku nos situashon lokal.
  • Ménos importante den konsiderashon di e konseho di biahe, ta e kantidat total di kasonan aktivo. Esaki, semper miéntras nos por manehá e kantidat di persona ku mester keda hospitalisá denter di nos kapasidat regular, i tambe limitá e kantidat di hende ku ta fayesé pa motibu di COVID-19.

Huntu ku e sektor di turismo, Gobièrnu ta hasi un apelashon na tur suidadano pa nos ataká i manehá e vírùs aki pa evitá ku nos pais ta keda destabilisá ekonomikamente. E situashon aki por kondusí ku hopi hende pareu ta pèrdè trabou òf bira malu, i esaki nos no ke. Esaki lo tin un impakto sosial hopi grandi i tambe su efekto riba término largu riba nos salubridat públiko. Ta un situashon kaminda ku lo kousa ku nos lo sinti e posibel efektonan di e krísis ekonómiko sigur den a añanan benidero, meskos ku ya nos por tuma nota di e efektonan sikológiko serka personanan den nos komunidat ku ta sufri di problemanan ku nan salubridat emoshonal i mental.

Netamente pa evitá e efektonan aki, Gobièrnu i sektor turístiko ta keda reiterá e mensahe sentral: Keda bo kas! Si ta posíbel, traha fo’i kas. Sali solamente pa hasi kompras nesesario òf regla kosnan urgente. Fuera di esei: Keda bo kas! No pensa ku abo no ta kore riesgo. Kuida bo mes na trabou tambe. 

Djaluna 14 di desèmber, Gobièrnu di Kòrsou ta evaluá si e medidanan ku a keda implementá dia 1 di desèmber último tabata sufisiente pa baha e kantidat grandi di kasonan positivo pa dia òf si mester intensifiká esakinan. E eskoho ei ta dependé di e komportashon di kada un di nos. Hasi’e pa bo mes, bo sernan kerí i nos país. Pa nos por gosa di un fin di aña relativamente normal i pa pronto nos por mira mas turista atrobe na Kòrsou.

Ministerio konserní