Gobièrnu no a tuma desishon den kaso di finansas di Enseñansa pa 2021 - Informashon tokante Gobièrnu di Kòrsou Bo opinion

Notisia

Gobièrnu no a tuma desishon den kaso di finansas di Enseñansa pa 2021

Geplaatst op 28 June 2020 dor di Ministerio Enseñansa, Siensia, Kultura & Deporte

WILLEMSTAD – Gobièrnu di Kòrsou a tuma nota di informashon ku ta bai rònt den medionan tokante di kortamentu den enseñansa i den kantidat di maestro. Gobièrnu ta informá ku no tin niun desishon riba e puntonan aki.

Na e momentunan aki, Gobièrnu tin vários komishon di eksperto ku ta traha riba proposishonnan i ta den deliberashon interno ku Gobièrnu i partnernan den enseñansa. Manera ta e kaso tur aña Ministerio di Finansas ta manda un kuadro presupuestario pa e aña benidero ku tur Ministerio mester kumpli kuné basá riba ekspektativanan di fondonan disponibel. Ministerio di Enseñansa, Siensia, Kultura i Deporte (ESKD) a tuma nota di esaki i a indiká ku mester bai analisá kiko ta faktibel i kiko no. Minister i Ministerio di Enseñansa ya a reuní ku direktivanan di skol i ku sindikato SITEK i a disidí di instalá un tim di eksperto pa hasi mas análisis i kontinuá deliberashon ku vèlt i ku Ministerio di Finansas. Kualke proposishon lo keda presentá i deliberá den Konseho di Minister pa asina tuma un desishon final kon ta aloká fondonan den presupuesto di pais pa 2021.

Gobièrnu su punto di salida ta ku kambionan struktural mester ta na benefisio di kalidat i inovashon den enseñansa. Pa e motibu aki mes, Gobièrnu ta den deliberashon pa di forma responsabel atendé ku e finansas di e kartera di Ministerio di Enseñansa, Siensia, Kultura i Deporte i ta enfatisá ku no a tuma ningun desishon riba esaki.

Ministerio konserní