Gobièrnu ta aktuá na edifisionan dekaí den Breedestraat den Otrobanda
Publiká riba
02 Mart 2024
Willemstad – Ministerio di Tráfiko, Transporte i Planifikashon Urbano (VVRP) ta informá ku e edifisionan na Breedestraat 190 i 190a den Otrobanda ta forma un peliger debí na nan estado dekaí. Riba djadumingu 3 di mart lo laga kontratista eliminá esakinan
Debí na awaseru di e dianan aki, e edifisionan su estado a sigui deteriorá, i gobièrnu mester aktuá pa evitá kualke daño na hende i/òf na edifisionan den banda. A hasi varios apelashon na e doño di e edifisio aki pa e mes por atendé ku esaki, pero lamentablemente esaki no a duna resultado. Gobièrnu lo desmantelá e edifisio riba gastunan di e doño.
Ta trata aki spesifikamente di Breedestraat 190-190a. Dus un edifisio ku ta konektá ku 190. Esaki ta e edifisio ku ta forma e peliger maa grandi. Esaki pa motibu ku 190a ta konektá na dje, i pa evitá ku muraya por kai riba edifisio number 188, mester hasi e trabounan di desmantelashon na 190 i 190a. Gobièrnu ta deseá na hasi lo máksimo pa kuida e monumento protehá na number 188.
Gobièrnu a laga un kompania eksperto hasi un investigashon. E konklushonnan di e rapòrt aki ta un di e basenan pa e desishon pa desmantelá e edifisio.
Huntu ku Polis di Tráfiko lo sera parti di Breedestraat Otrobanda riba djadumingu pa por ehekutá e trabounan aki. Lo tin desviashon di tráfiko. Tráfiko ku ta bin for di Roodeweg lo wòrdu desviá i por drenta Kortijnweg, sigui pa Witteweg, sigui den Belvederstraat, pasa den Freederikstraat, i asiná por yega bèk riba Breedestraat. Lo tin un ruta alternativo pa peaton tambe den e área di Breedestraat.
