Notisia

Willemstad – Pa hopi aña tin un lista di espera di mas o menos 400 siudadano ku a hasi petishon pa un tereno pa planta fruta i berdura pa uso propio òf pa kuminsá un kunuku pa por bende. Gobièrnu ta bai traha di forma aselerá riba dunamentu di e terenonan pa metanan agrario pa tur suidadano ku a hasi petishon ya pa algun aña kaba por bini na remarke.

Minister di Tráfiko, Transporte i Planifikashon Urbano sra. Zita Jesus-Leito, huntu ku  Minister di Salubridat, Medio Ambiente i Naturalesa sra. Suzy Camelia-Romer ta pone forsa huntu pa aselerá e proseso pa dunamentu di tereno. 

A palabra ku lo bai tuma 3 paso pa por kumpli ku e palabrashonnan:

1. inventarisá tur petishon ku tin pa yega na un bista konkreto di kuantu petishon pa tereno tin
2. analisá kuantu tereno pa usonan agrario gobièrnu ta disponé di dje
3. regla e aspektonan atministrativo pa duna tereno na esnan ku a hasi petishon denter di e próksimo 6 lunanan. 

For di e akuerdo di gobernashon “Realisando Kòrsou su máksimo potensial”, partidonan a palabra ku otro ku lo duna atenshon na agrikultura, peska, ganaderia i protekshon di bestia. Esaki a resultá un bon meta na momentu ku e importashon di fruta i berdura for di Venezuela a stòp. For di yüli 2018, Konseho di Minister a tuma e desishon ku lo traha konsistentemente riba e maneho pa mas konsientisashon na pueblo pa ku e área di plantashon. VVRP i GMN a fórmula klaramente ku ‘Gobièrnu ta apuntá un òf mas área di tereno ku ta ser parselá i destiná pa agrikultura i/òf krio di bestia pa konsumo.’ 

Di e forma aki, tur esnan ku a hasi petishon pa un tereno pa metanan agrario den pasado por keda sirbi. 

MAS NOTISIA

Ministerio konserní: Tráfiko, Transporte i Planifikashon Urbano