Publiká riba 15 Sèptèmber 2020
WILLEMSTAD – Gobièrnu di Kòrsou ta den deliberashon ku tur ‘stakeholder’ pa asina yega na un kolaborashon riba e mihó manera pa trata ku e krísis di COVID-19 den e área di enseñansa. Durante e último simannan a dialogá na diferente okashon ku vários representante di sektor di enseñansa. Entre otro a tene un webinar kaminda mas ku 70 stakeholder a partisipá. Aki a deliberá ku tur direktiva, lidernan di skol, maestronan i sindikato i a pidi nan kontribushon i aporte. Djaluna último dia 14 sèptèmber a bolbe deliberá pa huntu duna kontenido na e medidanan di prevenshon ku Gobièrnu a anunsiá pa loke ta trata sektor di enseñansa.
Miéntras ku e situashon rondó di e vírùs ta sigui desaroyá rápido, sektor di enseñansa ta keda hasi lo posibel pa huntu yega na e mihó desishon i solushonnan balansá na interés di nos enseñansa.
E tim stratégiko di Krísis pa ku COVID-19 a deliñá, ku den e situashon aktual, e medida preventivo pa enseñansa na skol ta un kantidat máksimo di 25 alumno den un lokal . Esaki ta konta pa enseñansa for di grupo 8 bai ariba teniendo kuenta ku posibel riesgo pa alumno i maestro. A anunsiá e medida preventivo aki djaluna 14 di sèptèmber. Den e reunion ku a tene riba e mesun fecha aki ku Sektor di Enseñansa i Siensia a deliberá ku representante di tur direktiva di skolnan riba e punto aki pa riba nan turno kada un deliberá ku kabesnan di skol. Pues e siman aki kada direktiva lo tin espasio pa duna kontenido na e medida preventivo menshoná, segun e sirkunstansianan di nan skolnan. Tambe Gobièrnu ta kontinuá diálogo ku representantenan sindikal den transkurso di e siman aki. Punto di salida prinsipal ta, pa tuma prekoushon, trese mas trankilidat tantu pa alumno komo dosente i sigur tambe e mayor di moda ku edukashon por kontinuá di forma adaptá den e normal nobo.
E kantidat máksimo di 25 alumno ta nifiká ku skolnan por parti klasnan di un forma efektivo pa maestro i alumno, evaluando e situashon na kas i e nivel akadémiko. E meta ta, pa adaptá esaki di un forma ku ta salbaguardiá preparashon i edukashon di e alumno. A palabrá ku direktiva i kabesnan di skol pa bini ku un proposishon kon ta e mihó forma pa duna kontenido na e esaki. Kaminda tin akseso na e fasilidatnan lo hasi uzo di enseñansa riba distansia (afstand onderwijs) p’asina por mantené e kantidat di alumno máksimo stipulá den e lokalnan. Kada direktiva di skol, huntu ku nan skolnan, mester yega na un plan di ehekushon den kua nan ta duna kontenido responsabel na e medida aki i ta tene bon kuenta ku e protokòl pa skolnan.
Gobièrnu di Kòrsou ta ehekutando un trayekto aselerá pa implementá internèt high-speed na skolnan ku posibilidat ku bario i alumno tambe por tin benefisio di esaki. Den kolaborashon ku Digicel a repartí tambe 100 aparato Mi-Fi, (kada un ta konektá 10 alumno) ku internèt grátis komo solushon temporal pa usa ora mester duna lès riba distansia den periodo benidero.
Ministerio di Enseñansa, Siensia, Kultura i Deporte ta keda den diálogo kontinuo ku tur partner den enseñansa pa huntu duna kontenido na medidanan di prekoushon den skol. Ku esaki Gobièrnu kier mustra ku kontribushon di tur stakeholder ta bon biní i ta keda balorá pa huntu, kana e kaminda pa manehá e pandemia di COVID-19 mas mihó posibel, protehando nos komunidat i garantisá e proseso di enseñansa seif i na nivel pa tur nos muchanan.
*****************************
