Notisia

Kurso pa kolaboradornan di Deporte di Fundashon Fasilidatnan Deportivo di Kòrsou (FDDK).

WILLEMSTAD – Sektor di Kultura & Deporte di Ministerio di Enseñansa, Siensia, Kultura & Deporte den koperashon ku FDDK i Student Sport Federation Dutch Caribbean (SSFDC) ta organisá dia 22 pa 25 òktober 2019 un kurso pa kolaboradornan di deporte. E kurso akí ta parti di un trayekto di formashon ku lo keda sostené dor di “Universidad Autónoma de Santo Domingo (U.A.S.D.)”. Alabes ta ekploranado posibilidat pa traha huntu ku e Universidat den e ramo kultural pa den un futuro serkano nos sigui ku internashonalisashon den e área akí tambe. Den e kuadro akí Kòrsou ta risibí bishita di sr. Jose Rafael Beras Rodriguez, dòktor den siensia pedagógiko na fakultat di deporte di U.A.S.D. ku lo ta na enkargo di guia e kurso pa kolaboradornan.

FDDK pa años ta ofresé komunidat di Kòrsou e produkto Deporte den bario kaminda kordinadónan deportivo boluntarionan, ta atendé ku hóbennan den barionan di Kòrsou. Pa medio di e proyekto akí, diferente deportista ku awe ta alsa nòmber di Kòrsou den eksterior a risibí formashon deportivo. Despues ku e kolaboradornan deportivo a indiká nan nesesidat pa formashon kontinuo (refreshment), Sektor di Kultura & Deporte den estrecho koperashon ku SSFDC a intermediá ku Universidad Autónoma de Santo Domingo pa bin ku un programa pa profeshonalisá i optimalisá personanan den e ramo deportivo. E proyekto Deportivo di den bario konosé un kantidat di 120 kolaboradó ku lo risibí formashon den un forma struktural. E promé grupo ta konsistí di máksimo 20 persona. E kurso lo kuminsá djamars 22 óktober 2019 i lo tuma lugá den sala di Sentro Deportivo Kòrsou.

Di e manera akí Gobièrnu ta duna kontenido na e programa di gobernashon ku tin e meta pa stimulá desaroyo di nos sektor deportivo den nos barionan. Fasilitando nos kolaboradornan den e ramo deportivo kontinuamente ku konosementu i eksperensianan nobo. Lo sigui fortalesé e produkto deporte den bario komo ku esaki ta parti integral di e plan pa desaroyo kontinuo di nos deporte den nos nashon. Pesei Sektor di Kultura & Deporte ku ta enkargá ku deporte lo sigui kana huntu ku tur ‘partnernan’ stratégiko pa brinda kolaboradornan deportivo lokal un aserkamentu profeshonal pa hiba nos hóbennan na desaroyá nan máksimo potenshal den e ramo di deporte.

Pa mas informashon di e “Universidad Autonoma de Santo Domingo (U.A.S.D.)”, por bishitá e siguiente página wèp: www.uasd.edu.do.

—
KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte