Gobièrnu ta duna homenahe na Baluarte- i Embahadornan di Karnaval 2020 - Informashon tokante Gobièrnu di Kòrsou Bo opinion

Notisia

Gobièrnu ta duna homenahe na Baluarte- i Embahadornan di Karnaval 2020

Geplaatst op 19 February 2020 dor di Ministerio Enseñansa, Siensia, Kultura & Deporte

Willemstad – En konekshon ku 50 edishon di Karnaval Kòrsou Era Nobo, Gobièrnu di Kòrsou ta duna homenahe na algun Baluartenan den e historia di karnaval i Embahadornan di karnaval 2020. Konseho di Minister a invitá tur e embahadornan di 202 i algun Baluartenan na Fort Amsterdam pa di e forma akí demostrá gratitut pa nan aporte na konstrukshon di un di eherensianan kultural importante di nos nashon, ku ta Karnaval.

E baluartenan ku a keda honrá riba e atardi akí ta: sr. Benjamin “Shon Bènchi” Wefer, sr. Rudy Rooy, Radio Curaçaose Radio Omroep (CUROM) den persona di sr. Orlando Cuales, Asosasion di Músiko i Artista Kòrsou (AMAK) sr. Manfred “Feko” Gomez i Giovanni Atalita, sr. Reginald”Doble R” Recordino, sr. Stanley Ignacio i sr. Pedro “Hermanito” Narvaez. Tur a aportá na e fundeshi di nos Karnaval den e 50 edishonnan ku a pasa.

E historia di karnaval a kuminsá 60 aña pasá na 1961 ora ku Shon Bènchi a inisiá ku e promé parada. Danki na esaki nos por bisa ku te awe nos tin un produkto kultural fuerte ku yama Karnaval. Na 1971 Shon Bènchi a bini ku e lema “Karnaval pa un i tur i pa uni tur” kaminda bandanan a kuminsá partisipá huntu ku steelband. Esaki a bira e Karnaval Era Nobo den kua Tumba a kuminsá zona. Na 1971 Boy Dap a gana e festival di Tumba ku a kuminsá na Roxi di e aña ei ku e Tumba titulá “Bash’é”. Pues Festival di Tumba tin un ròl sumamente grandi den realisashon di Era Nobo di Karnaval di Kòrsou.

Alabes Gobièrnu a duna honor na nos embahadornan di e di 50 edishon di Karnaval Era Nobo ku ta: Rei di Tumba Reaynor Lauffer, Rei di Tumba Hubenil Chrysander Leonora, Reina Adulto Kimberly Martis, Prens Adulto Ruwandy Regales, Pancho Adulto Quiten Brunken, Reina Tiner Rashailis Martis Rei Tiner Kyon Chirino, Reina Hubenil Sarina Subaran, Prens Hubenil Railipo Martina, Pancho Hubenil Raimison Martina i Reina di Karnaval di Band’Abou Nissah Libiee. Tur a keda honrá pa tur Minister. Kada Minister a dediká un palabra komo muestra di gratitut na esanan ku a pone un bon fundeshi na selebrashon di Karnaval den e diferente aspekto manera transmishon, dokumentashon, organisamentu di Karnaval, komposishon di letra i melodía pa Tumba i Festival di Tumba.

Pa klousura di e atardi Minister di Enseñansa, Siensia, Kultura i Deporte sr. E. Rhuggenaath a yama kada un di e invitadonan danki pa nan partisipashon i nan aporte den konstrukshon di e historia kultural di nos pais.

KOMUNIKASHON

**riba e potrèt nan athunto por tuma nota di e momento ameno na momentu di homenahe di e baluartenan i embahadornan di karnaval 2020

Pa mas potrèt por bishitá e link aki: Homenahe Karnaval 2020.

Ministerio konserní