Gobièrnu ta duna honor i rekonosementu na Produktornan di e pelíkula 'Atardi' - Informashon tokante Gobièrnu di Kòrsou Bo opinion

Notisia

Gobièrnu ta duna honor i rekonosementu na Produktornan di e pelíkula ‘Atardi’

Geplaatst op 22 August 2020 dor di Ministerio Enseñansa, Siensia, Kultura & Deporte

Gobièrnu a duna honor i rekonosementu na produktornan di e pelíkula ‘Atardi Rudy Plaate’ den presensia di famia di Rudy Plaate

WILLEMSTAD – Gobièrnu di Kòrsou a duna honor na e tim ku a produsí e pelíkula “Atardi Rudy Plaate” den fòrti. E produktornan Selwyn de Wind, Sulin Passial i Wendy York huntu ku e yu muhé mayor di Rudy Plaate, Coraline Plaate a keda invitá na Fòrti kaminda miembronan di Gabinete Rhuggenaath a duna rekonosementu na e tim pa nan tremendo produkshon.

Durante di e bishita serka e Ministernan E. Rhuggenaath, H.Koeiman i Z.Jesus-Leito a interkambiá ku e produktornan di e obra i tambe a kombersá ku yu muhé Coraline Plaate di e bida i historia di Rudy Plaate. Tambe e produktornan a konta nan eksperiensia na momentu di traha e dokumental huntu ku e famia. Kon den estrecho koperashon ku e famia a elaborá riba e obra i yega na akuerdo pa asina produsí e pelíkula dokumental “Atardi Rudy Plaate”. E pelíkula ‘Atardi’ ta un dokumental di e bida i herensia musikal di e renombre trobador kurasoleño Rudy Plaate. E dokumental ta trese dilanti e historia tras di algun komposishon konosí di e mas ku 400 obranan ku el a krea den su karera. Rudy Plaate su aporte ta forma un fundeshi úniko di melodia i harmonia musikal di nos nashon.

Gobièrnu di Kòrsou ta sumamente orguyoso i ta rekonosé e gran balor di e dokumental ‘Atardi Rudy Plaate’ ku ta muestra di un parti di nos historia musikal. Un danki di kurason na e famia i produktornan pa nan aporte i kontribushon balioso na un dokumentashon históriko ku ta keda pa semper komo un regalo na nos komunidat i futuro generashonnan.

Pabien Kòrsou, bo ta grandi i riku den historia i nos Rudy Plaate ta forma parti integral den esaki.

KOMUNIKASHON

** Riba e potrètnan athunto por tuma nota di e entrega di e rekonosementu na e produktornan Selwyn de Windt,  Sulin Passial i  Wendy York.

 

Ministerio konserní