Gobièrnu ta duna inisio na programa pa drecha kasnan den bario - Informashon tokante Gobièrnu di Kòrsou Bo opinion

Notisia

Gobièrnu ta duna inisio na programa pa drecha kasnan den bario

Geplaatst op 18 June 2020 dor di Ministerio Asuntunan General i Promé Minister

WILLEMSTAD – Promé Minister Eugene Rhuggennaath i Minister di Desaroyo Sosial, Labor i Bienestar Sr. Koeiman, a duna inisio na trabounan di un programa realisá pa Reda Sosial pa drecha kasnan den barionan na Kòrsou. Esaki a tuma lugá durante di un enkuentro ku e 10 kontratistanan chikí ku lo bai hasi diferente reparashon na algun kas di famianan ménos pudiente, den barionan di Otrobanda, Buena Vista, Bándabou i área di Montaña. Reda Sosial ta realisá e programa aki riba enkargo di Gobièrnu di Kòrsou. E parti inisial di e programa ta un invershon di ANG 300.000 i ta keda finansiá ku fondonan di Strategia di Kresementu pa Kòrsou.

Meta di e proyekto ta pa mehorá e kasnan dor di hasi reparashon i hasi e kasnan mas agradabel pa biba. E programa di un banda ta dirigí pa mehorá e bibá di e famianan den nan mes kas i di otro banda e ta pa krea aktividat ekonómiko, kaminda kontratistanan chikí ta haña trabou. E trabounan ta konsistí di entre otro kambia bentana i portanan, hala stupi, fèrf kas, drecha murayanan i tambe remplasá palunan putrí. Eskoho di e kasnan a ser hasí a base di kriterianan bon definí despues ku Ministerio pa Desaroyo Sosial, Labor i Bienestar i organisashon den barionan a registrá e kasnan serka Reda Sosial. E promé fase di reparashon di e kasnan aki ta proyektá pa finalisá aki tres siman.

Ku hopi entusiasmo Promé Minister Rhuggenaath ta konstatá ku e proyekto aki ta un oportunidat úniko, kaminda ta duna un man na kasnan di famia den gran nesesidat. Promé Minister Rhuggenaath: “Boso no solamente lo desplegá boso ekspertisio, pero ku kada fèrf, kada blòki, ta duna un man sosial na un famia i ta mehorá su kalidat di bida. Algu ku lo keda pa nan pa bida largu. P’esei ta importante pa nos para ketu na kon grandi e trabou chikitunan ku boso huntu a bin ta hasi aki, ta pa nan i pa Kòrsou.”

Promé Minister Rhuggenaath a sigui bisa mas aleu ku e kontratistanan ya ta hasi nan trabou di kurason i ku e famianan ta sinti’é. El a enfatisá ku kada trabou ku nan hasi, pronto nos tur huntu lo por mira tambe ku – kas pa kas, blòki pa blòki – nos por konstruí un Kòrsou kaminda nos tur por gosa di un kalidat di bida digno i dushi.

Minister Koeiman  di su banda a bisa: “Nos ta un pais i pueblo ku mester saka man pa yuda nos hendenan. E trabou aki ta nifiká algu hopi importante pa loke ta trata e nesesidat básiko di kualke ser humano, esta un bon dak riba su kabes. P’esei mes nos ta sumamente orguyoso komo Gobièrnu, di ta parti di e komienso kaminda nos ta bai saka man pa yuda un parti di nos pueblo. E proyekto aki ta duna tambe oportunidat pa trabou na hendenan desempleá i tambe na hendenan ku a kai na kaminda òf a bai será i ku tin bia tur porta ta sera pa nanKòrsou ta parti di World Heritage, ta Yunan di Kòrsou a traha tur loke a bira e monumentonan. Ke men ban hasi kada trabou ku nos hasi un monumento chikitu, paso nos tur su esfuerso ta forma un mihó Kòrsou.”

Ministerio konserní