Publiká riba 27 Novèmber 2020
WILLEMSTAD – Riba inisiativa di Konseho di Minister, un Komishon di Evaluashon a keda instituí na luna di yüni 2019 ku e meta pa hasi un evaluashon profundo riba e aktual Lei di Integridat pa (kandidato) Ministernan (Landsverordening integriteit (kandidaat) ministers). Resultadonan di e evaluashon akí a keda finalisa resientemente den un rapòrt amplio ku proposishonnan i rekomendashonnan konkreto na Konseho di Minister, riba diferente aspekto di e lei. E rekomendashon prinsipal ta pa optimalisá e lei den su totalidat dor di prepará un lei adaptá, ku por remplasá e lei aktual. Entretantu Gobièrnu a entregá e rapòrt na Parlamento pa por deliberá riba e konklushonnan ku ta bini dilanti den e dokumento.
Motibu pa e evaluashon akí tabata ku na luna di mei 2019, Ministerio Públiko den un karta a trese na atenshon di Konseho di Minister algun opservashon i remarke importante riba implementashon di sierto di puntonan den e Lei di Integridat akí. Na momentu di e karta akí, tabatin diferente desaroyo den nos sosiedat ku tabata di influensia riba aplikashon di e lei. Basá riba e puntonan di atenshon ku Ministerio Públiko a trese dilanti, Konseho di Minister a haña nesesario pa laga evaluá e Lei di Integridat den su totalidat na un manera profundo.
E evaluashon akí a keda dirigí entre otro riba efektividat i efektonan di e lei akí den práktika, e puntonan di atenshon tresé dor di Ministerio Públiko, pero tambe puntonan tresé dor di Parlamento di Kòrsou, Konseho di Minister, formadornan i minister presidentenan anterior huntu ku algun otro persona i instansia ku e Komishon di Evaluashon a konsiderá imperativo den e investigashon akí.
Dia 7 di òktober último e Komishon a entregá e rapòrt final. Den e rapòrt, e rekomendashon prinsipal tabata pa remplasá e lei aktual den su totalidat ku un lei nobo. Esaki mirando e kantidat i embergadura di puntonan di atenshon ku e Komishon a enkontrá; algun di nan ku karakter fundamental i algun posiblemente en pugna ku Areglo di Estado i Tratado Oropeo di Derechonan Humano (EVRM). Basá riba esaki, lo ta na su lugá pa hala e lei aktual aden ora ta introdusí e lei nobo, ku lo enserá konsiderashonnan nobo di akuerdo ku e puntonan di atenshon den e evaluashon.
Den e rapòrt final, e Komishon a siñalá puntonan pa mehora den tur aspekto di e lei, manera ehekushon di e lei, interpretashon di e stipulashonnan i aspektonan ku falta den e lei. Tambe a konstatá vários aspekto práktiko ku mester di konsiderashon.
Un ehèmpel ta e manera general ku kandidatonan pa minister ta duna outorisashon pa hasi investigashonnan hopi spesífiko riba nan persona; tantu den kuadro hudisial, médiko, fiskal, transakshonnan no usual, komo tambe riba e aspekto di seguridat di estado. Pa motibu ku e outorisashon aki ta asina general, esaki ta trese sierto tenshon den e espasio legislativo ku sierto instansianan tin pa kompartí e informashon nesesario den kuadro di e lei. E komishon a raportá tambe ku meta prinsipal di e Lei di Integridat aktual mester ta mihó definí. E loke ku finalmente nos ke logra ku e produkto legislativo akí, mester keda definí muchu mas skèrpi pa asina brinda ménos espasio pa interpretashon suphetivo.
Aparte di tur esaki tin tambe den e lei aktual un falta di klaridat riba e definishon spesífiko pa terminologianan manera “interesnan komersial”, “funshonnan sekundario” i “aktividatnan sekundario”. Definishon mas amplio i spesífiko di e terminologianan akí pues lo mester kana huntu ku un mihó denominashon di e meta general di e lei akí. Debí na falta di klaridat den e definishonnan akí, ta surgi tambe sierto konsternashon na ki momentu un interes komersial, funshon sekundario òf aktividat sekundario ta en pugna ku meta di e Lei di Integridat.
Pa loke ta trata e efektonan di e lei aktual, e Komishon di Evaluashon ta konkluí ku aspektonan manera por ehèmpel riesgonan mará na e klóusula penal di e lei akí, e falta di prosedimentu, instrukshonnan práktiko i sosten profeshonal pa ehekushon di e lei, komo tambe e falta di klaridat riba e definishonnan ariba menshoná, ta laga muchu espasio pa interpretashon na ki momentu un persona berdaderamente a aktua kontra e meta di e Lei di Integridat. Esaki prinsipalmente mirando e klóusula di lei sumamente riguroso mará na esaki.
Por último e Komishon a duna di konosé tambe ku e lei aktual ta akapará poko rekurso i sosten práktiko tantu pa e formador komo pa e (kandidato) minister. Ta asumí outomátikamente ku ámbos tin konosementu di kontenido di e Lei di Integridat i ku nan lo por aktua sin ningun sosten práktiko ni un manual di prosedimentu i instrukshon.
Ku e reportahe akí, Konseho di Minister tin awor un noshon kiko ta e puntonan di atenshon riba kua lo mester bai traha proposishon i rekomendashonnan konkreto pa asina desaroyá un konsepto di lei muchu mas kualitativo.
