Gobièrnu ta hasi entrega di sertifikado na atleta Matthew Sophia - Informashon tokante Gobièrnu di Kòrsou Bo opinion

Notisia

Gobièrnu ta hasi entrega di sertifikado na atleta Matthew Sophia

Geplaatst op 27 July 2021 dor di Ministerio Asuntunan General i Promé Minister

WILLEMSTAD – Gobièrnu di Kòrsou ta hasi entrega di un sertifikado di apresio na e hóben atleta Matthew Sophia di 17 aña, ku a sa di gana medaya di plata den e kompetensia di atletismo riba e disiplina di kareda ku opstákulo (110m Hurdle). E atleta Matthew Sophia, su mayor sr. Kurt Sophia, su coach sr. Rudsel van Lamoen i presidente di Federashon di Atletismo sr. Caimin Douglas a keda invitá pa bin di bishita na Fòrti. Durante e enkuentro Promé Minister sr. Gilmar “Pik” Pisas i Minister di Enseñansa, Siensia, Kultura i Deporte (ESKD) sr. Sithree “Cey” van Heydoorn a duna un sertifikado na Matthew Sophia i a duna un ‘pin’ na su mayor, coach i sr. Douglas. Tambe e ministernan a yama nan danki pa e gran logro akí.  

Nos hóben Matthew Sophia a partisipá na e kompetensia den e ramo di deporte di atletismo durante e kampionato Oropeo U-20 na e siudat di Estonia, Tallinn (European U20 Championships Tallinn 2021). Den e kampionato el a konkistá e di dos lugá den e disiplina di kareda ku opstákulo (110m Hurdle). Gobièrnu di Kòrsou ta sumamente kontentu i ta felisitá e Federashon di Atletismo, pero en espesial e tim di The Glory Runners i Matthew Sophia ku e logro akí.

Den e kompetensia di atletismo nos tin vários atleta ku ta sobresalí. Nos hóbennan ta destaká di forma eksepshonal i ta representá nos dushi pais dignamente. Matthew Sophia a bin ta profilá bon den atletismo i a duna un tremendo presentashon den e tim di The Glory Runners. Federashon di Atletismo ta sumamente aktivo i ta stimulá e deporte di atletismo enormemente. Pesei Matthew Sophia, nasé na Kòrsou riba 17 di desèmber 2003, no ta deskonosí pa nan. E hóben prometedor akí a keda di trein i motivá pa nos mes hendenan. Matthew Sophia a partisipá na diferente aktividat lokal di atletismo aki na Kòrsou. Despues e talentoso yu di Kòrsou akí a biaha pa Hulanda kaminda el a bai representá Hulanda den diferentre torneo i kompetensia.

Pa mas informashon internashonal por bishitá  https://european-athletics.com/ pa tuma nota di e kareda: Kareda 100m Hurdle U-20 Kampionato Oropeo.

Gobièrnu di Kòrsou ta realmente satisfecho ku e logro akí. Pabien Kòrsou, nos por ta orguyoso di nos mes hendenan!

** Riba e potrètnan athunto por tuma nota di e momentu ku Promé Minister Pisas ta duna e ‘pin’ na Matthew Sophia i Minister di ESKD van Heydoorn ta hasi entrega di e sertifikado.

Ministerio konserní