Publiká riba 22 Yüli 2026
Willemstad, 22 di yüli 2026; Ku e akto simbóliko di demolishon di un parti di e edifisio eksistente, Gobièrnu di Kòrsou a marka awe e kuminsamentu ofisial di e proyekto di renovashon i modernisashon di Pòst di Brantwer Kòrsou i Servisio di Ambulans na Barber. E proyekto ta un paso importante den e plan di Gobièrnu pa sigui fortalesé e servisionan di emergensia na Kòrsou.
E seremonia, ku a tuma lugá na Pòst di Brantwer i Ambulans Barber, a konta ku presensia di Promé Minister, Gilmas Pisas, Minister di Hustisia, Shalten Hato, Minister di Salubridat Tyron Boekhoudt, representantenan di Brantwer Kòrsou, Fundashon Kuido Ambulans Kòrsou (FKAK), partnernan i otro invitadonan.
Den su diskurso, Minister Hato a indiká ku e renovashon ta mas ku solamente un proyekto di konstrukshon.
“Awe no ta solamente un seremonia pa kuminsá ku trabou. Awe ta un momento ku ta representá nos kompromiso ku e bomberonan i paramédikonan ku kada dia ta pone nan bida na riesgo pa salba bida di otro.”
E pòst na Barber a wòrdu konstruí na aña 2006 dor di Fundashon Kas Popular. Despues di binti aña di uso intensivo, e edifisio ya no ta kumpli ku e eksigensianan di un pòst moderno pa Brantwer i Ambulans. Ku e remodelashon, e fasilidat lo wòrdu adaptá na e nesesidatnan aktual, ku mihó espasio di trabou, infrastruktura moderno i fasilidatnan ku ta permití e personal duna un servisio di kalidat mas haltu.
Minister Hato a enfatisá ku durante hopi aña Brantwer Kòrsou no a risibí e atenshon ku e meresé, situashon ku e komo Minister di Hustisia a komprometé su mes ku mester kambia.
“Ora mi a asumí e responsabilidat komo Minister di Hustisia, mi a bisa klaramente ku Brantwer Kòrsou no por sigui siendo un di e servisionan lubidá. Promesa ta bon, pero pueblo ta spera resultado. Awe e resultadonan ta visibel.”
E renovashon di Pòst Barber ta forma parti di un serie di invershonnan struktural ku Gobièrnu a realisá den Brantwer Kòrsou durante Gabinete Pisas II i III. Entre otro, a invertí den brantspùitnan nobo, tènker, rescuewagen, ekipo modèrno, materialnan spesialisá, kursonan lokal i internashonal pa e personal, i den un proseso di modernisashon di e organisashon. Ademas, Gobièrnu a prepará pa kuminsá ku konstrukshon di un kazèrne sentral nobo di Brantwer Kòrsou na Montaña Abou. Pronto nos lo suministrá mas informashon di e trayekto di kazèrne na Montaña Abou tambe.
Durante e programa, Minister Hato a entregá simbólikamente e pèrmit di konstrukshon na Komandante Interino di Brantwer Kòrsou, sra. Anagertrudes Rodriguez pa ofisialmente e kuminsamentu di e trabounan di renovashon. Invitadonan tambe a mira un presentashon di e proyekto i un video ku ta mustra kon e pòst remodelá lo bira despues di finalisashon di e trabounan. E tempu di remodelashon ta programa pa trabounan tuma lugá den 10 luna di tempu.
E akto ofisial a sera ku e presentashon di e bòrchi di proyekto i un bishita guiá den e edifisio eksistente, kaminda a duna un bista di e mehorashonnan ku lo wòrdu realisá den e siguiente periodonan.
“Nos no ta solamente invertí den edifisio. Nos ta invertí den hende. Den e bomberonan ku ta kore den kandela ora tur hende ta kore sali. Den e ekiponan di ambulans ku ta yega promé ora kada sekònde ta konta. Nan ta meresé nos rèspèt, pero nan ta meresé tambe nos invershon.”
E lema di e proyekto ta reflehá e kompromiso di Gobièrnu:
“Huntu nos ta pone e promé piedra pa un futuro mas sigur. Ku e renobashon aki, Gobièrnu di Kòrsou ta sigui invertí den un Brantwer i Ambulans moderno, profeshonal i prepará pa sirbi nos komunidat durante hopi aña mas.”
[FIN DI KOMUNIKADO]
