Publiká riba 06 Febrüari 2020
WILLEMSTAD – Proyekto Talento, ku ta dirigí riba e desaroyo personal i profeshonal di ámternarnan, ta ranka sali ku su di dos temporada. Talento ta keda realisá den kolaborashon ku e programa di Desaroyo di Talento (TOP) -Bonaire, e ministerio di Asuntunan Interior di Relashonnan di Reino (BZK) i e representante di Hulanda na Kòrsou (VNW). E edishon number 2 aki di Talento ta konta ku partisipashon di 20 ámtenar. ‘Talento’ ta enfoká riba fortifiká e aparato públiko pa medio di un programa intensivo, personal i profeshonal di un aña dirigí riba kolaboradornan tantu den e parti di formulashon di maneho komo ehekushon di maneho. Kada partisipante lo sigui un trayekto di coaching i tambe un trayekto di training bou di guia di un mèntòr personal. E proyekto ta pa ámtenarnan ku ta formulá maneho i esnan ku ta traha den ehekushon di maneho, ku un nivel di estudio HBO òf mas haltu i / òf eksperensia di trabou riba e nivel aki. Tur empleado ku ke bini na remarke ta solisitá i ta pasa den un proseso di selekshon.
‘Kick-Off’ di Talento 2 a tuma lugá na edifisio di VNW. Armin Konket, minister di Gobernashon, Planifikashon i Servisio Públiko, a habri e atardi enfatisando e importansia urgente pa ekipá e ámtenar di forma ku e ta den posishon pa brinda komunidat e kalidat i nivel di servisio ku komunidat tin derecho di eksigí. Tambe el a trese dilanti di ta orguyoso di e echo ku Gobièrnu porfin a kuminsá invertí den formashon di su ámtenarnan. Den e kuadro aki e ta wak dilanti ku ansiedat riba e proseso pa sigui duna kontenido na ‘Government Acadamy Curaçao’. Ta asina ku ta trahando duru pa den kuadro di ‘Groeiakkoord’ yega na lantamentu di e ‘Government Academy’ ku lo brinda ámternan pa di un un forma kontinuo. Despues di mas ku 10 aña lo bai duna training nan basiko na e aparato públiko. Seguidamente tabatin un workshop duná pa señor Miles Mercera kende alabes ta un embahador di e programma ku ta hiba e título di ‘Living Your Best Life”.
Den e promé edishon a partisipá ámtenarnan di 4 ministerio. E di dos edishon aki di Talento ta akapará ámtenarnan di demas ministerionan. E partisipantenan lo siña di otro i konhuntamente nan lo interkambiá di konosementu ku nan lo por usa durante nan trabou diario. E meta ta, ku dor di aplika e teoria ku a wordu siña, lo bo hanja un impakto direkto den práktika. Dor di enfoká riba nan desaroyo personal y profeshonal, e talentonan lo siña atende mas mihor kunan retonan diariamente, tambe nan ta kontribuí ku retonan na trabou i tambe proyektonan konkreto den komunidat.
Mas informashon ta hanja na website, Facebook di Ministerio di Gobernashon Planifikashon i Servisio. Tambe por manda un e-mail na impulso@gobiernu.cw
Pa mas informashon por tuma kontakto ku Kesha Camelia na number 527-5635 òf na kesha.camelia@gobiernu.cw.
