Publiká riba 19 Mart 2020
WILLEMSTAD- Relashoná ku e brote mundial di e vírùs di Corona, a surgi tambe un demanda enorme pa produktonan destiná pa kuido, higiena i limpiesa pa asina yuda frena plamamentu di e vírùs aki.
Minister di Desaroyo Ekonomiko, sra Giselle Mc William ta konsiderá importante pa den e sirkunstansianan aktual pueblo tin akseso liber i hustu na tur e produktonan ku e tin mester pa por protehá su mes i
esnan rondó di dje. Pero tambe enfatisando e nesesidat ku a surgi pa komo Gobièrnu, yuda protehá e konsumidó di posibel abusu di preis pa loke ta trata e kategoria di produktonan aki.
A base di esaki, Ministerio di Desaroyo Ekonómiko (MEO) a kondusí un evaluashon di e merkado i a kompilá tur informashon nesesario pa asina yega na un regulashon di preisnan máksimo pa produktonan di kuido, higiena i
limpiesa tantu pa komèrsio por mayor (groothandel) komo tambe komèrsio na detal (kleinhandel). E regulashon aki ta nifiká ku, tanten esaki ta na vigor, ta prohibí komersiantenan pa bende òf ofresé e produktonan aki na un preis mas haltu for di e márgen stipulá dor di Gobiernu.
Pa medio di un areglo ministerial (PB 2020 no 17) a anunsiá ku entrante djaweps 19 di mart 2020, Gobièrnu ta introdusí un regulashon di e márgen di preis máksimo riba e siguiente produktonan:
Teniendo kuenta ku e preisnan mundial pa e diferente produktonan ariba menshoná tambe skòmel hopi ultimamente debí na e pandemia di COVID-19, ta e intenshon ku periódikamente MEO lo sigui monitoreá i evaluá e márgen stipulá aki pa asina hasi ahustenan kaminda ta nesesario.
E departamento di Inspekshon Ekonomiko a keda apuntá pa amplia nan régimen di kontrolnan rutinario i inkluí tambe supervishon riba kumplimentu di e desishon aki.
Den esaki ta pidi pueblo su koperashon pa si akaso bo tuma nota di preisnan eksorbitante di un di e produktonan ariba menshoná pa indiká esaki direktamente na e tim di inspekshon mandando un whatsapp na +5999 511-1444.
