Publiká riba 09 Yanüari 2018
Willemstad- Promé Minister Rhuggenaath a tuma nota di e tweetnan di Vise Presidente Tareck El Aissami di Venezuela ku Presidente Maduro lo a prolongá e medida pa tene fronteranan será ku Aruba, Kòrsou i Boneiru. Te asina leu Venezuela no a komuniká esaki ofisialmente ku Kòrsou òf Reino Hulandes, lokual ta desepshonante i ta wòrdu rechasá enfátikamente. A tuma kontakto ku Kònsùl- General di Venezuela atrobe pa optené aklarashon. Un anunsio òf splikashon ofisial no a ser duná ainda.
Gobièrnu ta keda di opinion ku seramentu di fronteranan unilateralmente di parti Venezuela no ta kuadra ku bon relashon entre paisnan bisiña tampoko ta kontribuí na un solushon pa práktikanan di kontrabanda. Nos ta rekonosé ku por tin práktikanan di kontrabanda. Kòmbersashonnan konstruktivo ta tumando lugá entre Reino Hulandes i Venezuela pa yega na solushon pa kontrabanda. Asina nos por menshoná ku djabièrnè awor na Aruba ta bai tin un konsulta entre Reino i Venezuela pa trata kon paisnan por kolaborá ku otro asina atendé ku e asuntu di kontrabanda. Nos ta sali for di punto di bista ku si yega na un akuerdo mutuo pa hèndel kontrabanda, ku Venezuela lo revoká e medidanan. Ta di sumo importansia pa tur partido koperá pa haña un solushon rápido.
Gobièrnu ta vigilá e situashon alabes e konsekuensianan pa Kòrsou di aserka. Te na e momentunan aki e konsekuensianan pa Kòrsou ta limitá pero si persistentemente tene fronteranan será esei por tin konsekuensia mas serio. Riba instrukshon di promé minister ta hasi e preparashonnan nesesario. E departamentonan relevante tambe ta traha riba posibel medidanan adishonal pa atendé práktikanan ilegal for di Venezuela.
