Publiká riba 04 Sèptèmber 2024
Willemstad – Gobièrnu di Kòrsou, riba inisiativa di Minister di Salubridat Javier Silvania, ta kuminsá un kampaña pa limpia Kòrsou i krea konsientisashon riba e tema di shushedat. Shushi ta trese malesa kun’é pa komunidat kompleto. Ministerio di Salubridat, Medio Ambiente i Naturalesa (GMN) a skohe pa hiba un modelo nobo di aserkamentu kaminda ta papia i deliberá ku komunidat promé. Despues por tuma akshon mas dirigí pa krea konsientisashon riba e motibu ku Kòrsou ta shushi, kon limpia Kòrsou i kon pa mantené nos isla limpi. P’esei a skohe pa yama e kampaña “Di bo, Pa bo, Ku bo”.
Minister Silvania, huntu ku algun eksperto riba e área di limpiesa i un sosiologio, ta bai bishitá Seis (6) área na Kòrsou. Na su debido tempu ta anunsiá kua bario. Ya kaba e promé dos (2) áreanan ta konosí. E promé enkuentro ta tuma lugá riba djamars, 10 di sèptèmber na Sentro di Bario Janwe pa 7’or di anochi i e di dos enkuentro ta tuma lugá riba djamars dia 24 di sèptèmber na Sentro di Bario Soto pa 7’or di anochi tambe. Pa e enkuentro di 10 di sèptèmber Gobièrnu ta invitá tur habitante di e barionan Montaña, Janwe, Dominguito, Saliña, Steenrijk, Beurs, Roi Santu, Hoenderberg, Marie Pampoen, Koraal Specht i besindario, pa bin deliberá riba e tema di shushedat di Kòrsou.
Una bes e deliberashon aki finalisá, Gobièrnu di Kòrsou ta bai kuminsá akshoná. Lo tuma tur e rekomendashon i proposishonnan di habitantenan ku ta bishitá e deliberashonnan na kuenta. Gobièrnu di su banda ya ta bai kuminsá komprometé su mes dor di pone algun konteiner di shushi grandi den e barionan, pa habitantenan por benta nan shushi afó. Gobièrnu ta sòru pa e shushi ei ta bai landfill, loke ta hasi limpiesa mas fásil pa e habitante. Di e manera aki tambe Gobièrnu por haña un mihó idea di kiko por funshoná òf no den su kampaña pa hasi Kòrsou limpi i den su inisiativanan pa konsientisá nos komunidat mihó kon pa mantené Kòrsou limpi tambe.
Minister Silvania i su tim di GMN ta warda boso na e enkuentronan di deliberashon pa asina nos pais por bira limpi i keda limpi.
