Publiká riba 26 Febrüari 2026
WILLEMSTAD – Riba djadumingu, promé di mart 2026, e di shete temporada di ‘Ki Bo Ke Men?’ ta kuminsá, e podcast ofisial di Gobièrnu di Kòrsou. Presentashon di e podcast ta keda na enkargo di Christopher de Wind i un biaha mas lo trata diferente tema (aktual). Ku e temporada nobo akí, Gobièrnu ta sigui enfoká riba komunikashon kla, aksesibel i transparente na komunidat. Tur djadumingu pa 7:30 PM ta publiká un episodio nobo via di e kanalnan ofisial di Gobièrnu di Kòrsou, i tambe komunidat por sintonisá esaki tur djadumingu 7:30’or di anochi via TeleCuraçao i 6:30’or di anochi via TV Direct.
For di su lansamentu na 2023, ‘Ki Bo Ke Men?’ a krese bira un plataforma regular kaminda tópikonan aktual, proyektonan di Gobièrnu i desishonnan riba maneho ta keda spliká na un manera komprendibel. Kada episodio tin un tema sentral, riba kua ta eksistí preguntanan den komunidat via di medionan di komunikashon òf riba plataformanan sosial. E kombersashonnan tin kontenido i ta krítiko ora ta nesesario, pero semper respetuoso. Transparensia ta primordial: echonan i splikashonnan ta forma e base, permitiendo e públiko pa forma un opinion bon fundamentá.
Den e podcast, funshonarionan públiko i ekspertonan di materia ta splika tokante maneho, proyektonan òf prosesonan den Gobièrnu. E meta no ta solamente pa informá, pero tambe pa duna konteksto. Esaki ta duna televidente i tambe oyentenan un mihó bisa riba kon desishonnan ta keda tumá i kiko esakinan ta nifiká pa Kòrsou.
Den temporadanan anterior a produsí un kantidat grandi di episodio ku kontribushon di e diferente ministerionan, instansianan gubernamental i otro organisashonnan públiko. Tópikonan tabata varia di e ‘Trayekto di Kódigo di Protekshon’ te na ‘Maneho di Benta kantu di kaya’. Tambe tabatin episodionan spesial ku algun Minister, kaminda a para ketu na nan kresementu, vishon i trabou i responsabilidatnan diario.
Temporada 7, ku ta kuminsá djadumingu promé di mart 2026, ta sigui konstruí riba e base sólido akí, ku enfoke un biaha mas riba temanan aktual, proyektonan i desaroyonan relevante pa Kòrsou i su siudadanonan. Ku ‘Ki Bo Ke Men?’, Direktorado di Komunikashon i Informashon, na nòmber di Gobièrnu di Kòrsou, ta trese maneho mas serka di e siudadano i asina sigui traha na konfiansa i partisipashon di komunidat.
Un invitashon ta bai pa komunidat pa sintonisá Gobièrnu di Kòrsou su kanal ofisial ‘Gob.’ (kanal 84 riba FLOW), pa mas informashon i produkshonnan oudiovisual. Tambe por sigui Gobièrnu di Kòrsou online via Facebook, Instagram, Youtube i e Whatsapp Channel ofisial di Gobièrnu di Kòrsou.
Personanan ku tin sugerensia pa tema òf un petishon spesial pa ‘Ki Bo Ke Men?’, por kompartí esaki via e kanalnan sosial di Gobièrnu di Kòrsou.
