Gobièrnu ta lansa enkuesta tokante transformashon digital na Kòrsou - Informashon tokante Gobièrnu di Kòrsou Bo opinion

Notisia

Gobièrnu ta lansa enkuesta tokante transformashon digital na Kòrsou

Geplaatst op 14 September 2021 dor di Ministerio Maneho di Gobernashon, Planifikashon i Servisio Públiko

WILLEMSTAD – Gobièrnu den su afan pa halsa kalidat di bida di nos siudadanonan, tin komo un di su prioridatnan pa enkaminá e proseso pa yega na mas digitalisashon den gobièrnu i di nos komunidat. Konsekuentemente, Minister Ornelio Martina ku tin enkargo di Ministerio di Maneho di Gobernashon, Planifikashon i Servisio Públiko (BPD) den koperashon estrecho ku United Nations Development Programme (UNDP), ta bai tene un enkuesta digital kòrtiku bou di públiko pa asina duna e siudadano e posiblidat pa partisipashon aktivo den e trayekto di transformashon digital na Kòrsou. For di djamars, 14 di sèptèmber, siudadadonan interesá por partisipá di forma digital na e enkuesta akí.

Meta prinsipal di e enkuesta virtual ta, pa duna ministerio di BPD un mihó bista unda gobièrnu ta pará ku digitalisashon. Di e forma akí mas mihó por determiná e kaminda ku mester kana pa realisá e vishon deseá. A base di entre otro e data ku lo risibí a traves di e enkuesta, lo entregá un rapòrt di UNDP na komienso di òktober.

Ministerio di BPD su punto di salida ta ku e transformashon digital akí no mester tuma lugá solamente den gobièrnu sino tambe den nos sosiedat, manera sektor privá, NGO’s i serka e públiko en general. Esaki ta rekerí un kambio profundo di nos manera di brinda servisio, dunando asina tambe impulso na inovashon.

Den kuadro di desaroyo i ehekushon di e vishon akí, Ministerio di BPD huntu ku UNDP a organisá den e siman ku a pasá un enkuentro virtual pa haña sa kon prepará nos komunidat pa sigui desaroyá su mes riba tereno digital. Durante di e tayer di trabou virtual akí, kaminda Minister Ornelio Martina tambe tabata presente, partisipantenan di nos komunidat a duna nan aporte pa evaluá unda nos ta riba e ruta di transformashon digital.

Pa por partisipá na e “Enkuesta Transformashon Digital” por bishitá e siguiente link: www.gobiernu.cw/enkuesta. E enkuesta lo keda aksesibel te ku djadumingu, 26 di sèptèmber 2021.

Si bo ta lesando e komunikado for di Gobièrnu su wèpsait, por fabor klek aki pa bai direktamente na e enkuesta.


Ministerio konserní