Publiká riba 22 Novèmber 2019
WILLEMSTAD – E esfuersonan di Promé Minister Eugene Rhuggenaath pa Kòrsou haña eksonerashon di e sanshonnan ku Merka tin riba produktonan petrolero Venezolano, a duna fruta. Konforme e petishon ku Gobièrnu di Kòrsou a hasi ku a tuma lugá 26 di sèptèmber último i alabes deliberashonnan ku Promé Minister Rhuggenaath a hiba riba 30 di sèptèmber último na Washington D.C., Merka a duna un lisensia nobo na benefisio di kompanianan lokal i pues komunidat di Kòrsou kompleto. Esaki Merka a konfirmá pa medio di su departamentu di Finansa.
E lisensia aki ta enserá ku PDVSA, Refineria Isla S.A. i Refineria B.V. (lesa ISLA) por komersialisá nan produktonan, pero solamente ku e propósito pa paga hende i/òf instansianan lokal ku nan tin ku paga ainda. E lisensia ta bisa ku ningun sèn di e bentanan ku tuma lugá por bai pa ISLA B.V. ni PDVSA. Ku otro palabra, tur pago mester ta na benefisio di hende i instansianan lokal ku di un òf otro manera mester haña pago.
E lisensia aki pues ta duna PDVSA òf ISLA e espasio nesesario pa kumpli ku tur sobrá pagonan lokal. E lisensia aki a pone ku Kòrsou a logra un státus similar ku otro pais òf kompanianan Merikano manera Chevron, ku por hasi negoshi ku PDVSA ku e estrikto regla ku nan so por benefisiá finansieramente di esaki i no PDVSA mes.
Den mesun rosea Merka ta bolbe remarká i rekòrdá Kòrsou ku esaki no ta motibu pa pensa ku e sanshonnan a kita i ku libremente por sigui hasi negoshi ku PDVSA, ya ku tur paso ta kondishoná. Den transkurso di djasabra 23 di novèmber Gobièrnu di Kòrsou lo invitá prensa pa duna informashon mas detayá di e lisensia.
