Publiká riba 21 Febrüari 2019
Gobiernu ta organisá seshonnan di informashon pa ámtenar
Willemstad- Gobièrnu di Kòrsou ta organisá un seshon di informashon spesialmente dirigí na tur empleado públiko (ámtenar). Meta di e seshon di informashon aki ta, pa di un manera transparente, komprendibel i responsabel, duna tur informashon nesesario riba desaroyonan aktual ku tin di haber ku trabou i funshonamentu diario di empleadonan públiko. Minister di BPD Armin Konket i Minister di Finansa Kenneth Gijsbertha a informá e sindikatonan reuní den CCvV, den un reunion riba djaluna ku a pasa, ku lo informá empleadonan debidamente.
E seshon di informashon aki ta forma parti di un seri di informashon ku Gobièrnu di Kòrsou lo bai organisá siguientemente pa su propio empleadonan públiko. Esaki ta hopi importante pa konsientisá empleadonan públiko tokante e situashon finansiero di Kòrsou. Den kuadro di esaki, ta organisá e promé tanda di informashon riba djabièrnè dia 22 febrüari, durante 3 seshon igual durante e dia. Asina ta fasilitá akseso pa tur ámtenar por yega na e informashon aki.
Kada empleado públiko tin e eskoho pa asistí na un di e seshonnan durante dia, den kordinashon ku su hefe di servisio. Ta importante pa menshoná ku tur servisio di Gobièrnu lo ta operashonal i lo ta habrí pa duna servisio na públiko. Sinembargo, mirando ku durante dia empleadonan públiko por ta asistiendo na e seshon di informashon ariba menshoná, Gobièrnu ta pidi indulgensia di públiko di antemano, pa eventual inkumbinensia.
