Gobièrnu ta pone atenshon na e dia internashonal kontra violensia i tentamentu na skol - Informashon tokante Gobièrnu di Kòrsou Bo opinion

Notisia

Gobièrnu ta pone atenshon na e dia internashonal kontra violensia i tentamentu na skol

Geplaatst op 06 November 2020 dor di Ministerio Enseñansa, Siensia, Kultura & Deporte

WILLEMSTAD – Ministerio di Enseñansa, Siensia, Kultura i Deporte (ESKD) den koperashon ku UNESCO Kòrsou a selebrá riba djaweps 5 di novèmber e promé Dia Internashonal kontra Violensia i Bullying na Skol, inkluyendo Cyber bullying. Minister di ESKD, sr. E. Rhuggenaath, a hasi entrega di un pakete edukativo na Direktiva di skolnan den forma di ‘Drive Thru’. Un pakete ku ta kontené hèrmèntnan basá riba “E kuenta di Fuerte”, ku ta yuda e dosente i maestro pa den union kombatí e tentamentu na skolnan.

Paisnan miembro di UNESCO (193) durante su Konferensha General aña pasá na Paris, unánimamente a aprobá pa riba e fecha akí para ketu riba Violensia i Bullying inkluyendo Cyber Bullying na skol. E tema pa e aña aki ta : “Together against Bullying in school”/”Huntu kontra tentamentu na skol”/ “Samen tegen pesten op school”

 Den e kuadro akí, Ministerio di ESKD i UNESCO Kòrsou tabatin e honor pa riba e dia akí regalá tur Direktiva di skol e ‘toolkit’ titulá “E kuenta di Fuerte”, ku e petishon pa nan kompartí esaki ku e skolnan ku ta resortá bou di nan. Skolnan J.W.Th. Schotborgh i Kolegio Don Sarto tambe a haña un toolkit i e skirbidó di e proyekto ta èks kabes di skol Rosette Balentina. E toolkit ta un kolaborashon entre UNESCO Paris, ku a aprobá tantu e proyekto “Break the Silence: Say NO to Bullying” komo fondonan pa asina e UNESCO School J.W.Th. Schotborghschool por a ehekutá esaki, UNESCO Curaçao, i IamSynergized.

 Den kuadro di SDG 4 (Metanan pa Desaroyo Duradero), ku ta fokùs riba kalidat di Enseñansa, J.W.Th. Schotborgschool ku ayudo di UNESCO Curaçao a lansa pues e proyekto “Break the Silence: Say NO to Bullying”. Den e proyekto a traha huntu ku IamSynergized ku a produsí e toolkit i material.  E toolkit ta basá riba e Kuenta di Fuerte, kual ta inspirí pa “Het Verhaal van Sterk”. E kuenta di Fuerte ta hiba nos den e mundu di Fuerte i su famia i amistatnan. Den e Kuenta nos ta bai riba aventura ku Fuerte. Nos ta papia di temanan manera kompashon, determinashon, union, desaroyo di talento propio, duna i risibí rèspèt, pensa riba solushon, aseptá otro, stima bo próhimo i bo pais i amistades.

 E toolkit ta konsistí di: 5 storyboard A3 pa usa durante kontamentu di e kuenta,1 buki pa maestro ku instrukshon pa e tareanan, 1 buki pa alumno ku tarea, 1 wega di karta talento i kualidat i 1 audio story. E material ta fásil pa usa i ta motivá muchanan i hóbennan pa papia riba temanan ku nos no ta toka fásil. E temanan akí hopi biaha ta riba e área sosial-emoshonal ku ta afektá e área intelektual.  Ku e toolkit di e Kuenta di Fuerte nos ta brinda maestronan e oportunidat pa papia ku nan alumnonan riba e tópikonan akí i pa krea un esfera pedagógiko mas positivo i amabel na skol. Meta di e toolkit ta pa kada mucha sinti nan mes resiliente, sa kiko ta nan talentonan i sa ku huntu bo por logra mas ku bo so. Muchanan resiliente ta ménos inspirá pa tenta otro pasó nan ta diferente riba tereno intelektual, físiko i sosial-ekonómiko.

 Gobièrnu por mira bèk riba un proyekto ku ta traha di forma duradero na bienestar di nos muchanan i ta yama e ministerio di ESKD i organisashon di UNESCO Kòrsou danki. E danki mester bai tambe na J.W.Th Schotborghschool ku a kuminsá ku e initiativa pa a bin ku e proyekto aki i asina pa entrega esaki na UNESCO Kòrsou. Nos muchanan ta disfrutá di e material aki sigur i nos ta konsiderá esaki un trayekto positivo ku ta kuadra ku e maneho di Pais.

KOMUNIKASHON

 ** den e potrètnan athunto por tuma nota di e momentu ku titular di Enseñansa, sr. E. Rhuggenaath, den kompania di Sekretario-General di UNESCO Kòrsou, sra. M. Browne, ta hasi entrega di e kaha di hèrmèntnan na direktivanan di skol.

Ministerio konserní