Publiká riba 14 Yüni 2020
WILLEMSTAD – Despues di e temporada di ‘lockdown’ ku Kòrsou a pasa aden a konsekuensia di e krísis di COVID-19, Gobièrnu di Kòrsou rápidamente a tuma e pasonan nesesario pa strukturalmente yega na un plan di rekuperashon sosial-ekonómiko duradero pa nos pais. Esaki konhuntamente ku e akshonnan ku tambe mester a tuma despues di a bai di akuerdo ku e proposishon di Hulanda pa sosten finansiero i kondishonnan mará na esaki. Den e último simannan tur Ministerio a traha duru na proposishonnan íntegral den kuadro di reformashon, ku huntu den un dokumentu konkreto a keda presentá na Kolegio di Supervishon Finansiero Kòrsou (Cft) pa Promé Minister Rhuggenaath riba djasabra 13 di yüni último.
Di e forma aki Gobièrnu di Kòrsou a kumpli ku e ‘deadline’ di 15 di yüni 2020, kual ta un di e kondishonnan ku Hulanda a pone pa por risibí e di 2 transh di sosten finansiero i alabes sigui brinda espasio pa mas kombersashonnan entre Hulanda i Kòrsou tokante e posibilidat pa risibí e di 3 transh. Den e dokumento a tene kuenta ku tur aspekto importante ku ta krusial pa kumpli ku e kondishonnan ligá na e di 2 transh, esta transparensha máksimo di e situashon finansiero di institushonnan finansiero, bahamentu di gastunan di personal den e aparato públiko i reformanan struktural. Pa ku e lastu e Ministerionan a bini ku diferente proposishon, ku ta sigui elaborá riba tantu e Strategia di Kresementu di Gobièrnu komo Akuerdo di Kresementu ku a sera ku Hulanda. Den e kuadro aki a pone prioridat grandi na hasi tur loke ta nesesario pa surpasá e situashon agudo ku a surgi pa motibu di e krísis di COVID-19, pa medio di ahustenan struktural riba tereno finansiero, ekonómiko i sosial.
Pa por yega na remarke pa e di 3 transh di sosten finansiero, Gobièrnu a inkluí den e plan 8 área di atenshon pa yega na reforma sosial i rekuperashon ekonómiko di forma efektivo i efisiente. Ta trata aki di e siguiente áreanan: 1) desaroyo ekonómiko duradero, 2) merkado laboral dinámiko, 3) finansa públiko ekilibrá, 4) aparato públiko efisiente i produktivo, 5) salubridat públiko, 6) fortifikashon di e sistema di seguridat sosial, 7) desaroyo sosial duradero i 8) enseñansa di kalidat. Kada un área ta konsistí atrobe di algun punto di akshon ku mester bai logra tantu riba término largu komo kòrtiku. Punto di salida ta prinsipalmente implementashon direkto di e puntonan ku inmediatamente lo trese resultado. Importante ta pa menshoná ku Gobièrnu a sinta entre otro ku partnernan sosial den sektor privá, kaminda mas tantu posibel a tene kuenta ku e diferente nesesidatnan di komunidat na momentu di hinka e plan den otro. Ku esaki Gobièrnu di Kòrsou ta demostrá su intenshon serio pa berdaderamente trese un transformashon kompleto riba tereno sosial-ekonómiko, ku ta benefisiá pueblo di Kòrsou.
Gobièrnu di Kòrsou ya a kuminsá implementá vários di e puntonan di akshon, antisipando e momentu ku lo presentá e plan aki (inkluso konseho di Cft) na Hulanda riba 3 di yüli próksimo. Lo komuniká mas informashon di tur desaroyo pa ku esaki na komunidat atraves di e kanalnan ofisial di Gobièrnu i medianan lokal.
