Publiká riba 12 Mart 2021
E proklamashon akí ta tin komo meta pa dediká atenshon na konsientisashon, formashon i desaroyo di konosementu, kapasidat i uso di matemátika. Esaki ta pa fortalesé e komunidat pa por ta mihó prepará di forma ku por ta kompetitvo riba merkado i pa por ta resistente den bida diaro. E inisiativa akí ta keda ehekutá komo ku UNESCO a proklamá 14 di mart komo dia Internashonal di Matemátika na e di 40 Konferensia General na novèmber 2019. Esaki ta mustra riba e importansia di desaroyo di e materia pa hende, pero en partikular pa mucha. Konsiderando ku dominio di matemátika ta yuda ku desaroyo di pensamentu krítiko, lógiko i abilidat pa solushoná problema den bida diario i alabes ta stimulá e realisashon di Sustainable Development Goals (SDG4), Gobièrnu a bai di akuerdo ku e inisiativa pa pone mas enfoke riba e materia den luna di mart tur aña.
Ministerio di Asuntunan General, Ministerio di Enseñansa, Siensia, Kultura i Deporte huntu ku UNESCO Kòrsou i Fundashon Tur Ta Konta, ta bai trahá ku skolnan, otro organisashonnan konserní i komunidat pa traha riba e formashon, konsientisashon i aktividatnan ku enfoke riba e materia di matemátika durante di luna di mart tur aña. Ta pone énfasis riba 14 di mart ku ta dia Internashonal di Matemátika i tambe 24 di mart ku ta dia di ‘De Grote Rekendag’. Ta bai enkurashá organisashonnan edukashonal pa traha riba aktividatnan relashoná ku matemátika komo instrumento pa desaroyo di nos komunidat.
Klik aki pa download e proklamashon: UNESCO – Proklamashon Luna di Matemátika 01-03-2021
