Publiká riba 12 Mart 2019
Willemstad – Despues di a risibí raportahe di e komishon ʹDoorlichting Begroting 2019ʹ, Gobièrnu di Kòrsou mester konkluí ku lamentablemente no por paga kompensashon di 3% ni indexering. Gobièrnu tin e reto pa ahustá gastu i entrada di tal forma, ku por tapa e buraku di 126 mion florin riba presupuesto di 2019. Tambe e komishon ‘Doorlichting Begroting 2019’ a konkluí ku apénas tin espasio pa redusí gastu riba e presupuesto di 2019 i ku mester buska solushon den prinsipalmente akshonnan pa oumentá entrada. Konsekuensia lógiko ta ku Gobiernu no por oumentá gastu dor di hasi pagonan pa kua no tin un obligashon. Gobièrnu ta di opinion ku interes general no ta permití esaki.
E kompensashon di 3% ta poné den un desishon di Bestuurscollege di 24 november 2005, number 2005/25783 i 2005/25895b. E desishon aki ta bisa ku ta paga amtenarnan, ku a yega plafònt di nan salario i no ta haña kresementu di salario ni maske nan haña un evaluashon di funshonamentu positivo, 3% di nan salario. Pero, Bestuurscollege a mara esaki na e kondishon ku esaki ta tuma lugá solamente ora tin sufisiente medionan finansiero disponibel den e aña ku tin ku paga esaki. P’esei Gobiernu ta di opinion ku e diskushon den CGOA, pa kumpli ku orden di hues, mester ta riba e pregunta si Gobiernu tin e espasio finansiero pa por paga e 3% i no riba ki dia ta paga.
Gobièrnu no ta obligá na oumentá salario di ámtenar si no tin sufisiente medio finansiero
Gobièrnu, despues di a pidi konseho al respekto na su departamentunan, ta yega na e konkluson ku no tin lei ku ta obligá Gobièrnu pa oumentá salario di ámtenar na oumento di kosto di bida (indexering). Realidat ta ku Gobièrnu a bini ta hasi esaki pa hopi tempu, pero sin ku tin un lei ku tabata obligá Gobièrnu. Pues, tabata trata di un eskoho ku Gobièrnu a hasi durante tempu pa duna e adaptashon salarial aki. Gobièrnu ta konsiderá e reto pa tuma pasonan pa kubri un buraku di 126 mion florin pa trese e presupuesto den balansa, komo unu bálido i hustifiká pa no oumentá salario di ámtenarnan na 2019.
E posishon aki di Gobièrnu ta haña sosten den hurisprudensia. Gobièrnu a tuma nota ku Korte di Hustisia na Amsterdam, den un veredikto di november 2016, a husga ku un dunadó di trabou, te hasta si pa añanan largu el a paga oumento di salario di su empleadonan sin ku e tabatin e obligashon di paga, por stòp ku pago di e oumento aki si e dunadó di trabou tin motibunan bálido i hustifiká.
Hues di korte komun di Kòrsou, Aruba i St. Maarten, dia 22 di febrüari último, a ordená Gobièrnu i Centrale Commissie van Vakbonden (CCvV) pa bai mesa di CGOA pa dialogá tokante:
1. Pago di indexering (punto di agènda number 8);
2. Otorgamentu di loontrede (punto di agènda number 9); i
3. Areglo di 3%.
Den e konteksto aki a reuní riba 28 di febrüari i 7 di mart último. E reunion di dia 7 di mart a konkluí ku e palabrashon ku minister di BPD, durante reunion di djamars 12 di mart 2019, ta duna posishon di Gobièrnu pa ku e siguiente pregunta di CCvV, esta: Gobièrnu tin e disponibilidat i boluntat di paga e 3% i paga ‘indexering’? Gobièrnu a partisipá na CCvV ku Gobièrnu ta habrí pa tuma nota di eventual opheshon ku CCvV lo por tin pa ku e punto di bista aki di Gobièrnu.
Lei ta obligá Gobièrnu na paga ‘loontrede’ i Gobièrnu ta kumpli
Gobièrnu, promé ku CCvV a pidi Korte di Hustisia pa ordená Gobièrnu na paga e ‘loontrede’, a duna di konosé di lo paga ‘loontrede’ na fin di mart. Esaki mirando e echo ku aki si ta trata di un obligashon ku lei ta buta riba Gobièrnu.
