Publiká riba 10 Yanüari 2022
WILLEMSTAD – Minister di Desaroyo Ekonómiko Ruisandro Cijntje a tuma nota di e inkietut i diskushonnan ku ta tumando lugá bou di pueblo tokante preis di benta di e asina yama ‘zelftest’ di COVID-19.
Aktualmente Ministerio di Desaroyo Ekonómiko ta preparando un konseho pa Minister por aktua den kalidat di e Lei di Preis, kual ta hasi posibel pa Gobièrnu por intervení na momentu ku ta hasi benta di produktonan basá riba preisnan ku por ta kontra e.o. interesnan general. Nos tin un merkado liber, pero echo ta ku nos ta mei mei di un pandemia ku ta asotando nos. Minister di Desaroyo Ekonómiko lo duna mas detaye durante e siman akí i lo tuma akshon kaminda esaki ta nesesario i posibel. Huntu ku Minister di Salubridat, Medio Ambiente i Naturalesa lo adaptá maneho si esaki ta nesesario.
Minister di Desaroyo Ekonómiko na nòmber di gobièrnu ta pidi tur hende pa tene nan mes na e reglanan vigente, esta mantené distansia, laba man regularmente, bisti tapaboka i tene bo mes na reglanan di orden públiko. Alabes ta hasi un yamada na tur establesimentu pa kumpli ku e regla- i leinan ku ta na vigor.
