Publiká riba 02 Ougùstùs 2021
WILLEMSTAD – Riba 30 di yüli 2021, e fecha ku a keda dekretá dor di Nashonnan Uní komo e Dia Mundial kontra Trafikashon di Hende, e grupo di Trabou pa prevenshon di trafikashon di Ser Humano di Kòrsou bou di kordinashon di Ministerio di Hustisia, ta lansa su wèpsait www.HumanTraffickingPreventionCuracao.com den kuadro di su kampaña di konsientisashon. E wèpsait tin komo meta pa proporshoná mas informashon na públiko tokante di trato i trafikashon di ser humano. Esaki ku mira riba konsientisashon di personanan ku a bira viktima di trafikashon di ser humano pa ku e pasonan ku por tuma. E Grupo di Trabou a risibí un supsidio di 40.000 euro pa e kampaña akí di Ministerio di Hustisia. Dor di duna mas konosementu tokante di e problema di trafikashon di ser humano, ta stimulá e siudadano pa denunsiá práktikanan di trafikashon di ser humano òf pa informá polis.
Trafikashon di ser humano ta inkluí reklutá, transportá of akohé i hospedá personanan usando kalke forma di preshon ku e ophetivo di eksplotashon. Frekuentemente e víktimanan ta den un posishon vulnerabel. Ta chantaheá, menasá, maltratá of gaña nan. Trafikashon di ser humano ta enserá ku ta eksplotá nan òf ta obligá nan traha bou di kondishonnan degradante. Ta un violashon grave di derechonan humano i un forma grave di kriminalidat.
Pa un temporada kaba, trato i trafikashon di ser humano ta un prioridat pa Ministerio Públiko. E tipo di delitu akí ta relashoná estrechamente ku e fluho di imigrantenan indokumentá pa Kòrsou i ta pidi pa un enfoke multidisiplinario. Komo pais autónomo den Reino, Kòrsou ta obligá pa kumpli ku e akuerdonan establesé den e tratadonan ku ta toka derechonan humano, entre otro. Esaki ta inkluí e publikashon anual di un informe tokante di medidanan adoptá den e lucha kontra di trato i trafikashon di ser humano. US Department of State ta evaluá esaki i después, nan ta emití un ‘TIP report’ riba funshonamentu di Pais Kòrsou. Ta evaluá e paisnan a base di e kriterionan establesé.
Te ku 2018, a evaluá Kòrsou na nivel 2. Nivel 2 ta inkluí paisnan ku no ta kumpli kompletamente ku e normanan mínimo, pero ku ta hasi esfuerso pa kumpli ku nan. For di 2019, a pone Kòrsou riba e “watchlist” di nivel 2. Esaki ta nifiká ku e pais a hasi un esfuerso importante, pero no a aportá prueba di e oumento di esfuersonan pa kombatí trafikashon di hende den e aña anterior. Esaki ta posibel danki na e oumento di investigashonnan penal, persekushonnan i e kondenanan realisá na nivel lokal, e oumento di asistensia ofresé na víktimanan i e redukshon di komplisidat den trafikashon di hende dor di funshonarionan públiko. E sa sosodé tambe ora ku e kantidat di víktima baluá oumentá konsiderabelmente i e pais no tuma medidanan konkreto i proporshonal. Un puesto riba e “Watchlist” di Nivel 2 ta nifiká ku Kòrsou tin un historial malu kontra di trafikashon di hende.
Pa sali for di e situashon malu akí, e Grupo di Trabou pa ku trafikashon di ser humano den e último tres añanan a presentá vários proposishon di maneho ku a ser ratifiká dor di Konseho di Minister. Den e último sinku añanan, a hasi un total di 31 denunsia i/of mèldu di trafikashon di hende. Di e total akí, 22 a ser kondená.
Por haña e wèpsait i página di Facebook via e link di “Human Trafficking Prevention Curaçao”.
