Publiká riba 18 Mart 2019
WILLEMSTAD – Resientemente un grupo di mayor ku ta miembro di Fundashon Totolika a aserká Minister di Enseñansa, Siensia, Kultura i Deporte, sra. Marilyn Alcalá-Wallé ku e petishon pa gobièrnu para ketu i duna mas atenshon na personanan ku e síndrome di Down. E grupo di mayornan aki ta boga pa personan ku tin e síndrome di Down forma parti integral di un sosiedat inklusivo kaminda nan ta keda akseptá i tratá komo un suidadano ekitativo.
Un di e promé pasonan ta pa kuminsá trese konsientisashon di esaki den nos komunidat, kuminsando na skolnan pre-eskolar i skolnan di fundeshi. Tur aña riba 21 di mart, internashonalmente ta selebrá “Dia di Síndrome di Down”. Riba e fecha aki ta pone èkstra atenshon riba e alterashon genétiko ku yama Down serka un parti di nos poblashon. E aña aki, e lema ta: No laga ningun hende atras!” Den e kuadro aki mayornan a aserká Minister Marilyn Alcalá-Wallé pa huntu ku direktornan di skolnan pre-eskolar i direktivanan di skol di fundeshi, kuminsá e aña aki ku un kampaña pa bisti “Happy socks” riba “Dia Mundial di Síndrome di Down komo símbolo di atenshon na e lema aki. “Happy socks” ta meanan kolorido, ku dibuho alegre pintá riba dje. Esaki ta birando popular internashonalmente i Kòrsou tambe ta adoptá e kampaña aki.
Minister Marilyn Alcalá-Wallé ya a hasi un yamada na e skolnan pa pidi nan koperashon pa duna permit na e ekiponan eskolar pa bisti “Happy socks” riba e dia aki i pa sigui sostené e kampaña aki anualmente. Tambe ta hasi un petishon na mayornan pa si e skol duna permit, pa bisti e yu(nan) nan meanan kolorido alegre riba “Dia Mundial di Síndrome di Down” pa asina huntu nos por kuminsá trese konsientisahon i inklushon riba nos isla.
