Notisia

WILLEMSTAD- Tur aña riba dia di Rei nos sentro di siudat ta un di e sitionan di mas prominente kaminda selebrashonnan ta tuma lugá pa medio di aktividatnan di marshe, eventonan festivo i hopi mas. Na nòmber di Gobièrnu di Kòrsou, Ministerio di Desaroyo Ekonómiko ta hasi un yamada na tur persona interesá pa bende kos den sentro di siudat riba Dia di Rei siendo 27 di aprel 2020.Pa por bende kos riba Dia di Rei e personanan interesá mester hasi petishon pa un pèrmit temporal di standplaats òf  vènt serka organisadó di e evento.

 Un pèrmit di standplaats ta nifiká ku un persona ta risibí outorisashon pa para na un sitio spesífiko i bende su produkto miéntras ku un pèrmit di vènt ta destiná pa e persona ku kier bende kos di forma ambulante, esta moviendo di un lugá pa otro.
En konekshon ku dia di Rei Konseho di Minister a bai di akuerdo pa entrante 2020 en adelante repartí sentro di siudat di e siguiente forma:

• Zona 1: E área rondó di Marshe Rondó, inkluyendo Plasa Wilson ‘Papa’ Godett (plenchi dilanti di Pòstkantor) & de Ruyterkade kompleto (for di Sha Caprileskade te na e skina di Handelskade)
• Zona 2: Hanchinan di Punda kaminda normalmente sa tin marshe/aktividat durante Dia di Rei, inkluyendo Plasa Jojo Correa, Gouvernementsplein, Wilhelminaplein, Hendrikplen iWaterfortplein.
• Zona 3: Nieuwestraat i Kaya Wilson ‘Papa’Godett (Pietermaai).
• Zona 4: Breedestraat Otrobanda te na Frederikstraat (e kaya enfrente di Netto Bar).
• Zona 5: Brionplein i Awasá (Fuik).
• Zona 6: Molenplein te na Sebastopolstraat (stashon di bùs).

Pa un pèrmit di standplaats òf vènt pa bende kos den kualke un di e zonanan ariba menshoná riba dia di Rei 2020, mester hasi petishon direktamente serka e organisadó ku tin maneho di e zona siendo:

Zona 1: Fundashon Marshe (+5999 511-1176)
Zona 2:  Dutch Dream Special Events ( +5999 461-9393)
Zona 3: Evento Curaçao (+5999 788-1358)
Zonanan 4,5 i 6:  Sosiedat di Komersiantenan di Otrobanda (SKO) (+5999 462-3591)

Nos ta urgi tur persona ku ta deseá di bende kos riba Dia di Rei, pa tuma kontakto ku e organisadó konserní mas pronto posibel pa mas informashon komo ku e organisadó tin te ku 6 di aprel 2020 pa entregá e petishonnan pa e pèrmitnan di standplaats i vènt.

Entrante aña 2021 zona 5 i 6 lo ta disponibel pa mas organisadónan ku tambe lo ke e oportunidat pa organisá aktividat riba Dia di Rei. Pa mas informashon tokante dokumentonan nesesario i informashon general tokante e pèrmitnan temporal di standplaats i vènt, por tuma kontakto libremente ku e organisadó konserní òf ku Lokèt di Pèrmit na numbernan di telefòn 0800-1515 òf 433-4123.

MAS NOTISIA

Ministerio konserní: Desaroyo Ekonómiko