Publiká riba 13 Yüni 2019
Hefe di Servisio Meteorológiko Kòrsou, Dr. Albert Martis nombra komo segundo visepresidente di e Organisashon Mundial di Meteorologia.
Willemstad – Minister di Tráfiko, Transporte i Planifikashon Urbano Sra. Zita Jesus-Leito huntu ku Servisio Meteorológiko di Kòrsou, ta anunsiá ku Dr. Albert Martis a keda nombra komo segundo segundo visepresidente di e Organisashon Mundial di Meteorologia, World Meteorological Organization (WMO).
Nombramentu di Dr. Albert Martis a tuma lugá na Ginebra durante di e di 18 kongreso di WMO ku ta un Órgano Speshal di Nashonnan Uni. E kongreso a tuma lugá di 3 di yüni pa 14 di yüni 2019. Minister Zita Jesus-Leito tambe a hiba palabra na nòmber di Kòrsou durante e kongreso i elekshon dia 13 di yüni.
Durante su disertashon den Kongreso, Minister a asentuá ku Gobièrnu di Kòrsou a mustra kon Kòrsou i Servisio Meteorológiko Kòrsou ta aktivo den maneho pa redusí desaster i ta sostené e kandidatura di Kòrsou.
Na aña 2008 Dr. Martis a asumí e puesto di direktor di Servisio di Meteorológiko di Antia i Aruba i konsekuentemente ta e representante permanente na WMO. Na kambio di Antia pa Kòrsou na 2010 Dr. Martis a bira e promé direktor di Departamento Meteorológiko di Kòrsou i a keda apuntá komo e representante permanente di Kòrsou i St. Maarten na WMO.
Nombramentu di Dr. Albert Martis komo segundo visepresidente di WMO, ta nifiká un rekonosimentu pa e trabounan ku e la bin ta hasi na nivel nashonal i tambe den region di Karibe , nort i sentro Amérika komo direktor di Servisio Meteorológiko di Kòrsou. Ku e nombramentu aki Kòrsou ta haña rekonosementu i visibilidat mundial riba e tereno di meteorologia y klimatólogia, komo un di e paisnan ku por duna liderato, yuda otro paisnan i nan Servisio Meteorológiko pa avansá den nan tareanan nashonal. Esaki lo nifiká ku Meteo i su empleadonan lo wòrdu mas i mas envolví pa desaroyá òf tèst sistemanan proponé pa WMO i asistí otro paisnan den implementashon di e programa di WMO. Hasiendo e trabounan aki Meteo Kòrsou lo keda sigui desaroyá su personal pa sigui traha na e nivel mundial.
Minister Jesus-Leito ta felisitá Dr. Albert Martis ku e logro aki i ta spera ku e lo sigui hasi un bon papel den su trabou tantu lokal komo internashonal.
