Publiká riba 14 Mei 2020
Willemstad – Tur delito tin impakto riba tur esnan ku ta dirèkt òf indirekto envolví den un delito. Es desir e víktima i su famia i esun ku a kometé e delito i su famia. Sra Cecilia ta di opinion ku ta p’esei ta di sumo importansia ku na momentu ku ta trata di resosialisashon e profeshonalnan konserní mester tin bon konosementu di e konsekuensianan direkto i indirekto (kaminda ta involukrá e famianan tambe), pa na un manera optimal por duna e tratamentu i intervenshon metódiko na e detenido pa asina minimalisá i/òf prevení residivismo den futuro.
Riba Dia di Famia, den kuadro di resosialisashon, pa tur banda di e medaya, sra. Malvina Cecilia, kier a para ketu na un par di aspekto, sigur den e periodo di krísis di Covid19, kaminda ku famianan a demostrá di ta forma un base hopi importante pa por sobrebibí huntu e periodo aki. E intenshon no ta pa argumentá ni papia bon delitonan ku a wòrdu kometé. Importante ta si pa nos komo komunidat, despues ku kaba di invertí sèn i energia, den e proseso di resosialisashon di esnan detené, pa duna nan un chèns pa drenta bèk den nos komunidat komo parti di e famia grandi di Kòrsou. Komo un persona ku a siña di su fayonan i ku a komprondé kiko e konsekuensianan su aktonan tabatin pa e víktimanan i nan famia.
Riba Dia di Famia, pa medio di sra. Cecilia, na nòmber di un par di persona detené den SDKK ku a pidi eksplísitamente ku nan ke pidi diskulpa, na tur famianan ku tabata i ta víktima di nan delito(nan). Nan ta duna di konosé ku nan no ta orguyoso di nan komportashon rondó di e delito(nan) kometé. Ta p’esei, durante di nan periodo den SDKK den kuadro di resosialisashon nan ta dispuesto na aseptá tur ayudo ku por siña nan kon pa skohe pa pensa positivo, aktua positivo i atendé na un manera positivo ku situashonnan difísil i/òf problemátiko den nan bida. Den e forma aki nan tambe ta siña tene kuenta ku famia di otro hendenan ku nan a hasi daño na dje.
Sra. Cecilia ta sigui splika ku a skohe pa para ketu riba Dia di Famia na esnan detené i nan famia i asina di nan banda mustra ku nan ta agradesido, lòs di nan delito, ku nan famianan a sigui sostené nan durante di nan detenshon den SDKK. Realidat ta ku kada persona detené i nan famia ta eksperensiá i interpretá un periodo di detenshon na nan propio manera, es desir kada persona detené i nan famia ta eksperensiá e impakto otro. Un par di faktor ku ta influensiá e eksperensia ta edat, sekso, largura di detenshon, inteligensia, kantidat di biaha ku a wòrdu detené, personal di e prizòn, programanan di resosialisashon, kultura i posibilidatnan pa haña bishita òf tin kontakto ku famia. Impaktonan riba e persona detené mes ta entre otro sikológiko (metanan di bida no kumplí, konfiansa propio), salú en general (uso di droga, depreshon, miedu i desórden di personalidat), finansiero (e famia ta kai atras na entrada i ta bira dependiente di terseronan i asta despues di detenshon ta hopi difísil pa e èks detenido haña un trabou stabil), sosial (durante detenshon amigu i famia por bira lomba pa e detenido) i seksual (limitashon den afekshon i intimidat). Ora wak bon tur e konsekuensianan aki ta wòrdu transmití riba e famia di e persona detené i tin su impakto riba e famianan aki tambe.
Famia di persona detené hopi biaha ta wòrdu yamá ‘víktimanan invisibel’. Nan ta sufri a base di nan laso ku e persona detené. Tin ora asta nan ta wòrdu mirá komo ekstenshon di e persona detené. Ku konsekuensia ku regularmente nan ta wòrdu tratá manera ta nan mes a kometé e delito.
E impakto di detenshon riba famia di un persona detené tambe tin su konsekuensianan. Manera entre otro e detenshon (ta sinti ku nan tambe ta den prizòn), finansiero (mester paga abogado, pone sèn pa kantina, bai bishita na prizòn i gastunan na kas ta sigui normal), sosial (nan ta wòrdu mirá komo famia kriminal, hende ta hala pia for di nan, sosten di bo pareha no tei), emoshonal (no por komuniká ku otro i kompartí eksperensianan i situashonnan fèrfelu ku ta surgi kaminda ku pa falta di informashon bo ta preokupá pa ku bo ser kerí ku ta detené), yunan (e impakto negativo riba e komportashon di e yu i riesgo riba komportashon antisosial, kaminda e yu por bira agresivo, komportashon desviante, depreshon, miedu, problemanan pa drumi i kome, problemanan na skol i síkiko i tambe chèns grandi pa usa droga).
Den e kuadro aki SDKK, den su esfuersonan di resosialisashon, sra. Cecilia komo Hefe di e Unidat di Korekshon, ta sigui urgi pa e maneho ta dirigí riba programanan metódiko integral pa hasi e personanan ku ta detené, konsiente komo famia di e isla ku yama Kòrsou, di nan mes manera di pensa i aktua i pa siña tuma responsabilidat pa esaki dor di siña traha huntu na un manera positivo. Esaki tin ku konta pa e temporada di krísis ku nos ta aden aki, pa e temporada ku e persona ta detené den SDKK i tambe despues pafó di SDKK, den nan bida den su totalidat. Es desir na kas, na skol, na trabou, den deporte, arte, na fiesta, den tráfiko, ets.
Finalisando sra. Cecilia ta enfatisá ku ta hopi importante pa den e ‘Kòrsou Normal Nobo’ sigur den kuadro di resosialisashon, nos komunidat kompletu mester sigui ta un ròl modèl pa asina mustra i siña spesialmente nos hóbennan detené ku un komportashon positivo i sosial ta importante i ku esaki ta wòrdu sperá i deseá di nan tambe.
