Publiká riba 29 Òktober 2018
HIV-BIEP Programa di Prevenshon di Ministerio GMN i CURA+ ta haña ala
Willemstad – Ku ekspanshon di e ret di bario pa prevenshon di HIV i kampaña di konsientisashon pa Bandariba otro siman, e Programa pa Prevenshon di HIV-BIEP ku tin ku bai enserá un ret ku ta kubri hinter Kòrsou, ta kuminsá haña ala. E programa ta un koperashon di Ministerio di GMN ku e organisashon di Prevenshon i Kuido di HIV CURA+ i e sekshon di Prevenshon di MSM di Fundashon FOKO, ku e último lunanan un pa un a añadí barionan nobo na e ret di HIV-BIEP. ‘BIEP’ ta para pa ‘Bienestar i Prevenshon Seksual’. For di sèptèmber e ret di prevenshon di bario a start den e barionan Seru Papaya, Gibraltar, Santa Maria, Otrobanda i Bonam. Ku un enkuentro di informashon pa Santa Rosa i e barionan rondó di dje, awor e ret HIV-BIEP ta hasi su entrada tambe na Bandariba.
Ministerio di GMN ta finansiá e programa pa medio di un finansiamentu transitorio te ku fin di aña, pa despues sigui ku e programa riba un base di mas aña ku evaluashonnan periódiko. CURA+ ta spera ku pa fin di aña e ret di bario lo enserá 6 pa 7 bario. Promé ku e programa a kuminsá, CURA+ i FOKO tabata finansiá aktividatnan preparatorio for di nan mes fondonan i for di kontribushonnan di terser partido, manera kontribushon pa e enkuentronan di informashon di parti di e organisashonnan di bario envolví. Awor ku e programa lo finansiá alabes e servisio di konseheria i tèst rápido di CURA+, e organisashon por bai amplia e ret HIV-BIEP ku konseheria i tèst di HIV dirigí riba kada bario.
Mas aleu e ret HIV-BIEP ta enserá un Akuerdo di Koperashon entre CURA+, FOKO, Ministerio GMN, SEHOS i SVB, ku ta fasilitá pa personanan ku ta tèst positivo na CURA+ por keda referí mas lihé posibel pa e tim di HIV di SEHOS, si ta posibel mesun dia mes. Pa hasi esei posibel mester a yega na algun palabrashon tokante e proseso di referensha i registrashon na SVB. Partidonan ta spera di por firma e akuerdo definitivo den siman di Dia Internashonal di AIDS (1 desèmber próksimo).
Banda dje ret di prevenshon, e programa HIV-BIEP ta enserá tambe un serie di enkuentro di informashonnan na skolnan sekundario. Den e fase inisial CURA+ a tene enkuentro ku alumnonan di SBO Fr. Aurelio, SKAIH, KAP i IFE. Banda di esei a tene un seshon ku GOG, ku kua instansha CURA+ ta kombersando pa yega na mas palabrashon riba tereno di prevenshon i kuido. Pa loke ta dosente, a tene un seshon separá ku dosente di SBO Fr. Aurelio. Ta intenshon ku lo bini mas seshon separá pa dosente di otro skolnan.
E Programa HIV-BIEP ta enserá tambe seshonnan ku gruponan vulnerabel i empresanan. Den kuadro di esei e último lunannan a tene un enkuentro di hende muhé na Brievengat i un seshon eksitoso ku personal dje kompania C-Post.
###
