Publiká riba 02 Desèmber 2022
Willemstad – E hóbennan ku a partisipá na ‘Sociaal Vormings Traject (SVT)’ “Un Komienso Nobo” na Kazèrne di Marina Suffisant, a risibí nan barèt. E grupo di hóbennan akí, bou di guia di Defensa a kuminsá riba 22 di ougùstùs 2022 ku e promé fase di e estudio. Durante un periodo di kuater luna nan a siña den un forma militar norma i balornan manera disiplina, rèspèt propio, struktura, resistensia, konfiansa i sentido di responsabilidat.
E grupo di 15 hóben riba djaweps, 1 di desèmber 2022, por a risibí nan barèt ku nan a meresé huntu ku nan sertifikado durante un seremonia kòrtiku ku tur e partidonan envolví. Presente tabata entre otro Minister Presidènt sr. Gilmar Pisas, Minister di Hustisia sr. Shalten Hato, Minister di Desaroyo Sosial, Labor i Bienestar sra. Ruthmilda Larmonie-Cecilia, Minister di Enseñansa, Siensia, Kultura i Deporte sr. Sithree van Heydoorn i e Komandante di Forsanan Naval den Region Karibe, General di Brigada di Marinier Frank Boots.
Siguiente Fase
E di dos grupo di hóbennan lo kuminsá mes ora ku e segundo fase, e trayekto di aprendisahe (Leerwerktraject (LWT), bou di guia di e organisashon ehekutivo Funditut. Durante e fase akí e hóbennan ta kontinuá ku nan preparashon pa un funshon ku ta pas ku nan riba e merkado laboral, di akuerdo ku nan kapasidatnan. Ku e dos fasenan akí Gobièrnu di Kòrsou huntu ku Defensa ta brinda perspektiva pa futuro na e hóbennan akí.
Realisashon di e koperashon
E proyekto akí ta keda realisá den e kuadro di palabrashonnan entre Kòrsou i Hulanda, rondó di reformanan den e ‘Landspakket’. E reforma akí ta inkluí bou di e tema ‘H18’ i ta ser designá komo Programa di Formashon Sosial/‘Sociaal Vormings Traject’. Ministerio di Hustisia, Ministerio di Desaroyo Sosial, Labor i Bienestar, Ministerio di Enseñansa, Siensia, Kultura i Deporte i Ministerio di Defensa, tur ta partner den e proyekto akí.
Na febrüari 2023 ta bai kuminsá un SVT nobo di damas. Bo ke mèldu bo mes òf ta deseá mas informashon? Manda un e-mail pa: unkomiensonobo@gmail.com ku bo datonan (number, fecha i lugá di nasementu, kopia di sédula i number di último skol). Tambe por tuma kontakto via WhatsApp na number: +5999 563-6626. Tur hόben ku inskribí mester pasa un ‘assessment’ kual ta tuma lugá dia 12 i 13 di desèmber 2022.
