Notisia

Invitashon na Pueblo di Kòrsou pa huntu nos duna honor na nos ekipo di Senior League ku a titulá kampion.

WILLEMSTAD – Gobièrnu pa medio di esaki ta invitá pueblo di Kòrsou pa huntu, nos ban duna honor na nos kampionnan di e serie mundial di Senior League Baseball riba djaluna 7 ougùstùs 2023, na Plaza Brion Otrabanda. Nos hóbennan di liga P’abou a konkistá e título di kampion Mundial den kategoria Senior League 2023, na Easley, South Carolina representando e region di Karibe. Pa e motibu akí nos ta duna honor na nan pa a pone nòmber di nos dushi Kòrsou bria den henter mundu.

E programa ta kuminsá for di aeropuerto Hato ora nan yega pa 15:15 di atardi for di Estados Unidos. Nan ta keda risibí pa Minister di Enseñansa, Siensia, Kultura i Deporte sr. Sithree van Heydoorn huntu ku demas Minister nan di Gabinete Pisas. Despues di esaki ta sali ku un parada den un trailer direkshon Plaza Brion. E trailer ta pasa riba e ruta di Karnaval kompletu. E aktividat na Plaza Brion ta programá pa kuminsá 18:00 i ta terminá pa 21.00. Durante di e aktividat tin diskurso di representantenan di Gobièrnu, diskurso di spònser prinsipal i animashon musikal di grupo Orirí, One Flavaz i DJ Diego i Leannon Rumaay.

Tuma nota di e programa:

Gobièrnu di Kòrsou ta hasi un petishon na pueblo kompleto pa sali kas i saludá nos hóbennan riba ruta i huntu duna honor i apresio na nos hóben peloteronan, pa e echo di a pone nòmber di nos dushi Kòrsou resoná na kanalnan di televishon i radio pa mundu kompleto sa ki grandi nos ta.

Di e forma akí, Gobièrnu di Kòrsou huntu ku pueblo ta gradisí nos muchanan pa nan hazaña impagabel.

Nos ta topa na Plaza Brion djaluna, 7 ougùstùs próksimo.
—
Sr. Sithree van Heydoorn
Minister di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte