Notisia

Gabinete Rhuggenaath ta duna honor na nos kampionnan di edishon Internashonal i alaves sup-kampionnan mundial di “Little League World Series 2019”

Gobièrnu di Kòrsou ta duna rekonosementu na nos hóbennan di Little League ku a gana e título di kampionnan di “International World Series” i sup-kampion mundial. E tim a keda invitá pa minister enkargá ku Deporte sra. drs. Marilyn Alcalá-Wallé pa hiba un bishita serka Konseho di Minister na Fort Amsterdam. Tur Minister tabata presente pa risibí e hóbennan i nos Minister enkargá ku Deporte a hasi apertura di e atardi. Tur Minister di Gabinete Rhuggenaath a hiba palabra yamando muchanan danki pa e aporte balioso ku nan a duna, hasiendo promoshon pa nos pais pa medio di nan hazañanan. Nos promé Minister sr. E. Rhuggenaath a gradisí tur e hóbennan pa e balentia i kurashi ku nan a demostrá ora ku nan mester a representá nos pais den e weganan di serie mundial i bin ku e título di kampion di edishon internashonal i sup-kampion mundial pa 2019.

Puntonan remarkabel i ku nos ta keda konsiderá komo logronan eksepshonal ta: 

1. E manera ku Kòrsou a gana Cuba durante torneo na Kòrsou tabata impreshonante ku un “home-run” di Curley Martha i bon picheo di Profar;
2. Partisipashon di rumannan Profar a marka historia komo ku ta tur tres ruman a yega Williamsport i dos di nan a yega basta leu. Na aña 2004 Jurickson Profar a sali kampion mundial, 2005 kampion internashonal, na 2007 sub-kampion mundial, na 2008 Juremi Profar a yega Williamsport i e aña akí 2019 e ruman chikitu Judrick Profar a forma parti di e tim sup-kampion mundial di Little League Kòrsou;
3. Pa promé biaha den historia di Little League un ekipo a gana Korea i Japon den mes un torneo;
4. Curley Martha a mustra talento i abilidat den tur área: bateo, fildeo, picheo i karakter karismatiko;
5. Pa promé biaha for di aña 2007 Kòrsou a forma parti di “International Championship Game”;
6. Kòrsou a sa di gana kurason di e fanátikonan di pueblo merikano. Tur artíkulo a kaba den e diferente tiendanan di “souvenir”. Unda ku bo bira tur hende ta komentá riba Kòrsou su abilidat i talento i tambe komportashon humilde.

Tur e hóbennan den kompania di dirigentenan sr. Urny Floran, sr. Eugene Sambo, nan entrenadornan sr. Edmar Cornelia, Anthony Cijntje i manager Michelangelo Celestina a keda honrá ku un bunita ‘pin’ di bandera di Kòrsou. Gobièrnu di Kòrsou ta gradisí nos hóbennan ku ta digno representantenan di Kòrsou ku a demostrá kurashi, determinashon i pashon pa e kampionato di Little League World Series 2019. Danki pa e kontribushon na un imágen positivo i konstruktivo pa pais Kòrsou. Boso a sa di bende nos identidat kolektivo, nos bandera di un forma digno. Pueblo di Kòrsou kompleto ta gradesido pa e echo akí

Gobièrnu di Kòrsou ta kere den nos mes hendenan i ta duna suidadanonan rekonosementu na momentu ku nan kontribushon ta di gran balor pa konstrukshon di nos Nashon. Pabien Kòrsou, nos ta grandi!
—

KOMUNIKASHON
**riba e fotonan athunto por tuma nota di e momentu di rekonosementu na nos hóbennan den Fòrti huntu ku Gabinete Rhuggenaath. Pa mas potrèt por klik e link aki: Facebook  MOWCS

MAS NOTISIA

Ministerio konserní: Enseñansa, Siensia, Kultura & Deporte