Honor na Papiamentu - Informashon tokante Gobièrnu di Kòrsou Bo opinion

Notisia

Honor na Papiamentu

Geplaatst op 19 February 2020 dor di Ministerio Enseñansa, Siensia, Kultura & Deporte

WILLEMSTAD – Ministerio di Enseñansa, Siensia, Kultura & Deporte (ESKD) ta sigui pone atenshon na nos Lenga Materno den e periodo di nos idioma papiamentu ku ta di 8 pa 21 febrüari. Minister President sr. E.Rhuggenaath den su funshon komo Minister di ESKD a hasi un bishita na skol sekundario Pierre Lauffer (VSBO) na Djonoramarthaweg kaminda huntu a duna honor na nos Lenga Materno: Papiamentu.

Riba e bunita mainta aki a para ketu na vários poema/poesía di e Eskritor sr. Pierre Antoine Lauffer (1920 – 1981). Den kuadro di konmemorashon na sr. Lauffer Fundashon Pierre Lauffer tin vários aktividat planeá e aña aki. Señor Lauffer a nanse dia 22 di ougùstùs 1920 i den aña aki e lo a kumpi 100 aña si e tabata na bida. Den su bida semper e tabata un luchadó pa nos idioma papiamentu. Ela skirbi vários buki, poema/poezia i kuenta na Papiamentu. E dokumentashonnan aki ta forma parti integral di nos herensia nashonal pa mos idioma papiamentu. Su poemanan i kuentanan kòrtiku ta un aporte balioso pa herensia literario di nos idioma papiamentu. Tin un premio di nos idioma papiamantu na su nòmber ku yama: ‘Premio Bienal Pierre Lauffer, Chapi di oro’. Tambe e tin un kolekshon ku yama ‘Kuenta pa kaminda’, ku  ta skirbí ku mashá grasia i humor. Na mes momentu e ta deskribí e profunididat di bida di Kòrsou den su tempu.

Durante di e aktividat Minister Rhuggenaath a resitá tres poema di e selebré outor Pierre Lauffer i tambe alumnonan di e skol a presentá dos obra di e outor ariba menshoná den forma artístiko ku músika i dramatisashon. Tabata tin un momentu ku e hòben alumno Jehu Altidor a sa di deleitá ku saksofon un bunita poema komo klousura.

Gobièrnu di Kòrsou ta yama nos dosentenan i alumnonan danki pa e bunita mainta i na mes momentu ta gradisí nan pa nan aporte positivo den edukashon. Ku esaki Gobièrnu ta mustra ku e ta kere den nos mes hendenan ku ta yu di tera ku ta sigui promové nos idioma materno.

Boso aporte ta sumamente importante den formashon di nos komunidat!

Komunikashon.

Pa mas informashon di sr. Pierre A. Lauffer por bishitá:

Biografie van Pierre Lauffer: een mijlpaal

Pierre Lauffer: nationaal auteur

Ministerio konserní