Publiká riba 20 Novèmber 2018
Willemstad – E paisnan i entidatnan públiko ku ta forma parti di Reino Ulandes ke pa tur mucha i hóben den Reino lanta salú, den un ambiente sigur i ku amplio oportunidat pa nan desaroyá nan mes. P’esei nan a firma un “Memorandum of Understanding” (MoU), pa stimulá kolaborashon riba tereno di derechi di mucha. Den e akuerdo di kolaborashon aki, 7 punto di lansa ta para sentral: edukashon positivo, prevenshon di maltrato di mucha, desaroyo di “safetynets” (kontenido pa tempu liber despues di skol), partisipashon di mucha i hóben, asistensia profeshonal, sosten di mucha i famianan i atenshon spesial pa muchanan vulnerabel. E MoU ta bira realidat despues di un deklarashon di intenshon ku 7 mandatario a firma na Kòrsou, durante e di tres konferensia di e Taskforce di Reino enkargá ku derechi di mucha.
For di seis rapòrt di Unicef titulá “Muchanan den Reino: derechi di mucha den Reino Ulandes”, a sali na kla di forma konvisente ku medidanan èkstra ta sumamente nesesario, pa por mehora derechi di mucha na e seis islanan ku tabata forma Antia Ulandes. Kolaborashon i kompartí konosementu entre e isla i paisnan den Reino ta esensial pa por logra esaki.
Durante e konferensia di Reino di 2 di aprel 2014 na Aruba, mandatarionan a reiterá ku kada mucha den Reino tin derechi riba un bon infansia i hubentut, manera e Tratado Internashonal tokante Derechi di Mucha (IVRK pa su abreviashon na ulandes) ta stipulá. Durante e konferensia a disidí pa instituí e Taskforce di Reino enkargá ku Derechi di Mucha, ku tin komo tarea pa stimulá kolaborashon den Reino riba tereno di derechi di mucha.
Durante e konferensia di Taskforce di Reino enkargá ku Derechi di Mucha, ku a tuma lugá di 14 pa 16 di mei 2018 na Kòrsou, mandatarionan responsabel pa mucha i famia di e kuater paisnan i tres entidatnan públiko den Reino, a firma un deklarashon di intenshon. E deklarashon di intenshon aki tabatin komo meta pa fortalesé kolaborashon riba nivel di gobernashon tambe. Esaki pues a bin kondusí na firmamentu di e MoU, ku Reino ta publiká awe, riba Dia Internashonal di Derechi di Mucha.
E MoU ta deskribí e responsabilidatnan ku tur partido tin di forma individual, pa asina fortalesé kumplimentu ku e Tratado tokante Derechi di Mucha na nan isla of pais. Tambe e dokumento ta deskribí e shete puntonan di lansa, basa riba kual lo kolaborá na nivel di gobernashon. Kompartí konosementu i eksperensia ta indispensabel den esaki.
Parti di e MoU ta plannan di akshon individual konkreto di kada isla i e plan di trabou di e Taskforce mes. Ta evaluá i aktualisá e plannan di akshon anualmente. E akshonnan den e plannan di akshon ta duna kontenido na e puntonan di lansa inkluí den e MoU.
Ku firmamentu di e MoU ta fortalesé ròl di e Taskforce di Reino enkargá ku Derechi di Mucha i di e forma aki tur isla i pais den Reino ta avansá di forma konsiderabel den direkshon di kolaborashon basa riba resultado, pa loke ta trata derechi di mucha den Reino.
Pa mas informashon por tuma kontakto ku sektor Famia i Hubentut di Ministerio di Desaroyo Sosial, Labor i Bienestar na 434 0451.
