“Igualdat di género den enseñansa: inklushon i unidat” - Informashon tokante Gobièrnu di Kòrsou Bo opinion

Notisia

“Igualdat di género den enseñansa: inklushon i unidat”

Geplaatst op 22 March 2018 dor di Ministerio Enseñansa, Siensia, Kultura & Deporte

 

UNESCO Kòrsou a tene un konferensia sumamente eksitoso tokante “Igualdat di género den enseñansa na Kòrsou.

Durante e konferensia aki a trata diferente tópiko relashoná ku e tema kaminda e mucha hòmber ta kai for di e sistema di enseñansa prematuramente. Esaki a bira konosí bou di e konsepto “The boy problem”. E ta un fenómeno kaminda e sekso maskulino tin un retraso den prestashon den e kampo di enseñansa, kompará ku e sekso femenino.

UNESCO Kòrsou ku ta forma parti integral di Ministerio di Enseñansa, Siensia, Kultura & Deporte (ESKD) ta para pa igualdat den oportunidat di enseñansa. Esaki ta dirigí riba e desaroyo kompleto di un personalidat di kada ser humano irespekto ku e ta un hende muhe of hòmber. Pa e motibu aki Ministerio di Enseñansa,Siensia, Kultura, Deporte (ESKD) atraves di e UNESCO Kòrsou a tuma akshonnan pa por atendé mas mihó posibel ku e retonan den e kampo di enseñansa i asina trese e balansa bèk kaminda ta nesesario, teniendo kuenta ku e derechi fundamental di edukashon di kada mucha i hoben. E tema di e konferensia aki tabata en konekshon ku 21 di mart, Dia Internashonal kontra tur tipo di deskriminashon: “Promoviendo toleransia, inklushon, unidat i respèt pa diversidat den e konteksto di kombatí diskriminashon rasial”. Igualdat di genero ta un derechi fundamental, un bloke ku ta konstruí hustisia sosial i un nesesidat ekonómiko.

Den kuadro di esaki, diferente ékspertonan a hiba palabra. E tópikonan tratá tabata sumamente interesante i esakinan a bini for di diferente angulo. “Hopi man, un direkshon i direkshon!” tabata título di presentashon di Minister di ESKD sra. dr. Marilyn Alcalá-Wallé, presidente di UNESCO Curaçao. Sra. dr. Goretti Narain, kordinador di e investigashon “ Genderverschillen in onderwijsloopbaan op de eilanden van de Nederlandse Antillen”, ku aksento riba e resultado pa isla di Kòrsou, a elaborá riba e tema: “Boys can do better”. Sra. Susan Larmonie, direktor di maneho di ministerio di ESKD a trata e tópiko: “Deskubrí e potenshal di nos mucha hòmbernan”.  “Género i logro akadémiko” tabata tema di antropólogo kultural, sr. Richinel Ansano. Sr. Johan Oldenboom, sosiólogo a trata e tópiko: “Mi ke un kas den mondi”. Oradornan a trese diferente aspektonan dilanti ku tin influensha riba e diferensha entre géneronan. Por ehèmpel, enseñansa, edukashon na kas, medionan sosial, merkado laboral, eskpektativanan, ròlnan di género den nos sosiedat i den famia.

Invitadonan pa e konferensha tabata entre otro: Promé Minister di Kòrsou sr. Eugene Rhuggenaath, Minister di Desaroyo Sosial, Labor & Bienistar sr. Hensley Koeiman, Minister di Tráfiko, Transporte & Planifikashon Urbano sra. Zita Jesus-Leito, Parlamentarionan, Minister di Enseñansa, Siensia y Desaroyo Sostenibel di Aruba sr. dr. Armando R. Lampe, representante di Openbaar Lichaam di  Bonaire, maneho di Ministerio ESKD, Konseho di Hubentut, Rema Uní, SITEK, direktivanan di skol, skolnan privá, scouting, skolnan avansá i representantenan di e Plan di Urgensia di bario.

Despues di e presentashon a sigui ku un diálogo (paneldiscussie) kaminda e oradornan a kontesta pregunta di esnan presente i tambe esnan presente por a hasi remarke i komentario. Parti atardi e invitadonan a forma grupo i debati tokante diferente ponensia relashoná ku e tema di konferensia. E resultadonan a trese tur vários retonan dilanti i tambe posibel solushonnan pa asina por yega na un maneho di inklushon i unidat di género den nos eseñansa.Pa mas potrèt por bishitá página di Facebook di Ministerio di ESKD.

Di e forma aki nos ta sigui traha pa kada persona haña oportunidat igual den enseñansa pa desaroyá nan mes pa yega nan máksimo potenshal.

 

Ministerio konserní