Importansia di turismo lo no bai a kosto di interes general - Informashon tokante Gobièrnu di Kòrsou Bo opinion

Notisia

Importansia di turismo lo no bai a kosto di interes general

Geplaatst op 12 March 2020 dor di Ministerio Desaroyo Ekonómiko

WILLEMSTAD- Premirando riba posibel efektonan ku e Novel Coronavirus lo por tin riba nos Ekonomia i Turismo, Minister di Desaroyo Ekonómiko, Sra Giselle Mc William a bin ta hasi loke ta na su alkanse pa prepará i reforsá nos sektor turístiko mas tantu posibel. Sinembargo e minister ta reiterá ku si mester skohe entre interes general i turismo, e interes i bienestar general lo tin tur preferensia.

 Debí na e brote resien di e vírùs di COVID-19, nos sektor turístiko tambe ta enfrentá retonan pa por trata na garantisá seguridat tantu di nos turistanan komo tambe di e sentenáres di trahadónan den e sektor. Mas ku klaro, banda di e seguridat di e hende ta importante tambe pa hasi tur loke ta na nos alkanse pa tambe trata na salbaguardiá e pilar turístiko den su totalidat mirando ku esaki a bin ta sostené nos ekonomia grandemente durante último añanan.
Den su kalidat komo minister di tantu ekonomia komo turismo, sra Giselle Mc William a bin ta reuní ku diferente partnernan den e sektor turístiko pa asina monitoreá i kanalisá tur esfuerso nesesario pa e sektor aki ta bon prepará. Anteriormente sra Mc William a sinta ku CHATA i tambe Ofisina di Turismo i den e siman entrante tin plannan pa sinta ku CAP i CPA. Próksimamente, sra Mc William lo tin deliberashon tambe ku Kámara di Komersio i VBC pa asina komo tal nan tambe por duna nan aporte na e preparashonnan nesesario i posibel puntonan di atenshon ku lo mester tin den konsiderashon.
Riba petishon di minister Mc William, CHATA a organisá un seshon informativo ku lo tuma lugá den wikènt entrante huntu ku dr. Gerstenbluth pa asina yuda prepará personal di akomodashonnan lokal mas tantu posibel. Huntu ku esaki lo sigui organisá mas reunion informativo i trainingnan pa mas tantu posibel purba minimalisá efektonan ku e Coronavirus lo por tin riba nos turismo i ekonomia.
Sinembargo sra Mc William ta konsiente ku apesar di tur preparashon por resultá situashonnan imprevisto na momentu ku nos pais keda konfrontá ku e Novel Coronavirus. Pa ku esaki minister Mc William ta enfatisá ku apesar di e importansia di e sektor turístiko den e situashon ekonómikamente frágil ku nos pais ta na e momentunan aki, e importansia di esaki no ta surpasá bienestar i interes general di nos pueblo.

Ministerio konserní