Publiká riba 11 Desèmber 2022
WILLEMSTAD – Resientemente Ministerio di Hustisia i gerensia di SDKK a tuma nota di un informashon ku ta sirkulá den medionan di komunikashon, enkuanto di un grupo di famia ku a protestá riba e trato ku e indokumentadonan ta risibí diariamente na e Vreemdeling Opvang en Detentie Centrum ( VODC).
Primeramente Ministerio di Hustisia i Gerensia di SDKK kier enfatisá ku diariamente ta manehá e kompleho di VODC segun prosedura i lei, esta siguiendo tur tratadonan stipulá pa ku maneho di indokumentadonan. Pa ku e protesta ku tabatin di famianan di e indokumentadonan riba e trato médiko, konsumo i posibilidat pa komuniká, Ministerio di Hustisia kier informá ku tur indokumentado ta risibí atenshon médiko debidamente na momentu ku tin kualke kaso médiko dor di departamentu médiko di SDKK. Tambe pa loke ta trata e konsumo diario, tur klientenan di prizòn i indokumentadonan na VODC ta risibí kuminda tres biaha pa dia, esta desayuno, lùnch i kuminda di atardi. Un dietista ta hinka e menú di dia den otro i kontrolá esaki.
Pa loke ta trata e posibilidat pa komuniká ku famia i konosí, tin ku indiká ku tur indokumentado por hasi yamada telefóniko ilimitá via telefònnan ku tin disponibel, basta ku nan tin karchi pa por bèl. Tambe nos tin ku informá ku 1 bia pa siman, tur indokumentado por hasi uso di e sistema di bishita virtual (video call) pa por komuniká ku nan famia i konosínan.
Finalmente Ministerio di Hustisia ke rekordá ku resientemente mester a opta pa habri e kompleho nobo di VODC na momento ku a interseptá e último lancha. Den e dianan ku a pasa Gerensia di SDKK a bin ta hasi trámitenan pa operashonalisá e kompleho nobo konforme lei i normanan internshonal. Ainda tin algun trabou di konstrukshon chikí pendiente i tambe un parti di e inventario ku a kumpra den eksterior ku mester yega. Esaki no ta kita ku tur dia ta duna kontenido n’e programa di e indokumentadonan.
