Industria lokal ta traha riba mas kresementu i oportunidat pa Kòrsou - Informashon tokante Gobièrnu di Kòrsou

Notisia

Desaroyo Ekonómiko
 

Industria lokal ta traha riba mas kresementu i oportunidat pa Kòrsou

Publiká riba 22 Òktober 2026

WILLEMSTAD – Gobièrnu di Kòrsou ta sigui traha pa fortalesé industria lokal i krea mas oportunidat pa kresementu ekonómiko. Den e kuadro aki, Ministerio di Desaroyo Ekonómiko (MEO), huntu ku Curaçao Manufacturers Association (CMA), a organisá Dia Nashonal di Industria Lokal 2026 dia 15 di òktober na Curaçao Innovation Hub. Fabrikantenan lokal, representantenan di Gobièrnu i otro partnernan a reuní pa evaluá e progreso di industria lokal i papia tokante e pasonan nesesario pa fortalesé e sektor.

Bou di e tema Strengthening Curaçao’s Manufacturing: Skills, Markets and Competitiveness, e presentashonnan i kombersashonnan a enfoká riba inovashon, personal ku e abilidatnan adekuá, produkshon sostenibel, redukshon di e gastunan di hasi negoshi i akseso na merkadonan regional i internashonal.

Sekretario General Luelo Girigorie a duna e diskurso ofisial na nòmber di Minister di Desaroyo Ekonómiko Roderick Middelhof.

Konfiansa den futuro di industria lokal
Presidente di CMA, Herbert Luis, a enfatisá ku fabrikantenan lokal ta determiná pa sigui invertí, modernisá i amplia nan aktividatnan, apesar di e retonan ku e sektor ta enfrentá.

Djuwensi Passial, Spesialista di Análisis i Investigashon Ekonómiko na Banko Sentral di Kòrsou i Sint Maarten (CBCS), a presentá e resultadonan di e enkuesta mas resien entre fabrikantenan. Di e fabrikantenan ku a partisipá, 75% tin plan pa invertí, miéntras ku 61% a indiká ku nan produkshon a oumentá.

Margit de Freitas a presentá ehèmpelnan di kon empresanan lokal ta invertí, modernisá nan proseso i prepará pa kresementu. Guido Rojer Jr. a pone énfasis riba inovashon, kalidat i proseso di produkshon mas efisiente. E mensahe tabata kla: futuro di industria lokal no ta solamente den produsí mas, sino tambe den produsí di un manera mas inteligente, efisiente i sostenibel.

Kiko industria lokal mester pa sigui krese?
E kombersashonnan a mustra ku desaroyo di industria lokal ta pidi akshon riba diferente área. Tamira La Cruz a presentá e progreso di e proyekto di Landspakket, ku ta enfoká riba proseduranan gubernamental mas simpel, digitalisashon i redukshon di e gastunan di hasi negoshi.

Tambe mester sigui invertí den enseñansa tékniko. Benjamin Goeloe di R&B Management a presentá e proposishon pa Curaçao Technical Vocational School. E meta ta pa prepará mas profeshonal tékniko i konektá enseñansa mihó ku e nesesidatnan di empresanan.

Akseso na merkadonan nobo tabata otro tema importante. Bryan Bakboord di MEO a presentá e proseso digital nobo pa fasilitá eksportashon pa Aruba. Tirzah Doran, tambe di MEO, a papia tokante misionnan komersial, ferianan internashonal i otro merkadonan ku por ofresé oportunidat pa fabrikantenan lokal.

E konklushon di e dia ta ku Kòrsou tin talento, konosementu i empresanan ku ke sigui invertí. Awor mester transformá e ambishon aki den resultado konkreto: empresanan mas fuerte, mas oportunidat di trabou, mas produkshon lokal i mas produkto di Kòrsou riba merkadonan regional i internashonal.

Pa MEO, kolaborashon entre Gobièrnu, fabrikantenan, enseñansa i otro partnernan ta indispensabel pa logra esaki. Un industria lokal fuerte ta yuda diversifiká nos ekonomia i krea mas oportunidat pa Kòrsou.

Konosé nos produktonan lokal na Expo di CMA
Komunidat lo tin un siguiente oportunidat pa konektá ku industria lokal durante e Expo di CMA, djasabra 24 di òktober 2026, di 11’or di mainta pa 7’or di anochi, na Sambil.

MEO ta invitá komunidat pa bishitá e expo, konosé e empresanan i produktonan lokal, i mira kuantu talento i kapasidat nos tin na Kòrsou.

Ora nos skohe lokal, nos ta sostené nos empresanan, nos trahadónan i futuro di nos ekonomia. Nos industria lokal, nos orguyo, nos futuro.