Informashon eroneo ku Playa Parasasa lo bai pa desaroyadó
Publiká riba
07 Mei 2024
Willemstad – Minister Charles Cooper di Ministerio di Tráfiko, Transporte i Planifikashon Urbano ta duna informashon aklaratorio relashoná ku informashon eroneo ku ta sirkulá tokante Playa Parasasa. Tin un komunikado kual ta invitá suidadanonan pa partisipá na un manifestashon riba djarason 8 di mei parti mainta.
Minister Cooper ta lamentá ku ta saka informashon eroneo. Leinan di pais, manera entre otro ‘Stranden der zee’, ta prohibí kualke gobernante di atendé ku kosta di pais, sin ku Parlamento ta envolví.
Minister Cooper i Gobièrnu di Kòrsou no tin intenshon di entregá Playa Parasasa ni otro playanan den man di tersera i/òf desaroyadó.
Playa di Parasasa ta di pueblo di Kòrsou i lo keda di pueblo di Kòrsou. Es mas Gobièrnu, esta Minister Cooper huntu ku Minister Cijntje, ta bai desaroyá mas playa na Koredor gratis pa pueblo di Kòrsou.
Tin un kaso den korte pa e parti di playa na Marriot hotél, i esei gobièrnu ta respetá e proseso.
