Publiká riba 21 Ougùstùs 2024
Willemstad – Ministerio di Salú, Medio Ambiente i Naturalesa (GMN) ta sigui informá tokante Mpox, anteriormente yamá Monkeypox.
Kiko ta Mpox
Mpox ta un malesa ku ta ser kousá dor di un vírùs (Mpox vírùs) ku prinsipalmente ta manifestá su mes na e parti sentral i parti wèst di Afrika. E ta kategorisá komo un vírùs ku por lo general ta kousa síntomanan leve. Muchanan, hende muhé na estado i personanan ku un sistema immunológiko suak (komprometé) dor di malesa, tratamentu pa un malesa òf uso di sierto remedi, ta keda konsiderá komo gruponan di riesgo. Infekshon ku e vírùs aki por ta peligroso serka e grupo di riesgo. Tin dos variante di Mpox vírùs, kual ta Clade I i Clade II. E epidemia na aña 2022 a wòrdu kousa prinsipalmente dor di variante Clade II, miéntras e epidemia aktual ta wòrdu okashoná prinsipalmente dor di Clade I. E variante aktual (Clade I) ta parse di ta mas infeksioso ku e variante na aña 2022 (Clade II).
Situashon internashonal
Dia 15 di ougùstùs 2024, Suesia a raportá su promé kaso ku e variante Clade II i dia 16 di ougùstùs Pakistan a raportá su promé tres (3) kasonan di Mpox pa aña 2024. Na ámbos pais ta trata di personanan ku a regresá di biaha for di eksterior.
Posibel síntomanan:
E malesa ta kuminsá ku un òf mas di e siguiente síntomanan:
– Keintura;
– Doló di kabes;
– Doló di múskulo, kurpa;
– Kalafriu;
– Kansansio;
– Klir hinchá (e.o. na garganta i “lies”).
Despues di 1 pa 3 dia ku un òf mas di e síntomanan aki manifestá, ta aparesé un “uitslag” (rash) kual ta kuminsá den mayoria kaso na kara i ta ekspandé bai henter kurpa. E rash ta kuminsá komo un vlèk i despues e vlèknan ta transformá bira blar. Despues ku e blarnan seka, i krea un kaska, nan te keda 2 pa 3 siman pa despues e blarnan seku (kaska) aki kai. Ora e blarnan seku kai nos por bisa ku e persona a kurá di e malesa. Mpox por wòrdu fásilmente konfundí ku otro malesanan manera entre otro ‘sende paga’ (waterpokken) òf Krentenbaard/Impetigo. P’esei ta importante pa un persona ku tin síntomanan ku por ta relatá na Mpox i tabata den kontakto direkto ku un persona ku a tèst positivo pa Mpox vírùs òf a bishitá un di e paisnan ku tin kasonan di Mpox aktualmente, pa tuma kontakto ku bo dòkter di kas pa por hasi e tèstnan nesesario i hasi e diagnóstiko korekto. Den kaso ku un persona tèst positivo pa Mpox, e persona tin ku bai den isolashon.
Kon por prevení kontagio
Kontagio ku Mpox ta sosodé di hende pa hende pa medio di kontakto direkto ku un persona ku ta infektá. Kontagio ta sosodé prinsipalmente dor di kontakto ku “slijmvlies” òf e blarnan òf herida riba kueru di un persona infektá ora ta mishi, karisia, brasa, sunchi i/ òf tene relashon seksual (oral, vaginal i/ òf anal). Tin un chèns chikí ku kontagio por tuma lugá tambe dor di paña i/ òf laken kontaminá. Pa prevení kontagio ku Mpox ta importante pa evitá kontakto direkto ku un persona infektá òf hende malu. Mpox ta kontrolabel si e síntomanan ser rekonosé, si tin akseso na kuido i si tuma e medidanan nesesario.
Pa informashon adishonal por tuma kontakto ku sra. Irálice Jansen, hefe di Departamento Infectieziektebestrijding (IZB) riba number di telefòn: 523 1530.
