Informashon pa Fundashonnan
Publiká riba 12 Sèptèmber 2018
Seshon informativo ku fundashonnan pa brinda mihó servisio na komunidat den kuadro finansiero responsabel
WILLEMSTAD – Minister di Enseñansa, Siensia, Kultura & Deporte, sra. drs. Marilyn Alcalá-Wallé huntu ku representantenan di tim di maneho di Ministerio di Enseñansa, Siensia, Kultura i Deporte (ESKD) a tene un reunion informativo pa representantenan di tur fundashon ku ta keda supsidiá dor di e Ministerio.
Meta di e reunion aki tabata pa informá e fundashonnan ku anualmente tin un suma di aproksimadamente fl 365 mion riba presupuesto pa Enseñansa, Siensia, Kultura i Deporte, pero ku komunidat no ta nota e resultado di e invershon aki. Ademas e forma ku trabounan ta keda organisá aktualmente ta hiba na un situashon finansiero prekario. Ta importante pa optimalisá esaki.
Alabes a resultá den práktika ku diferente fundashon no ta kumpliendo ku e eksigensianan pa risibí supsidio di gobièrnu. Tambe ta remarkabel ku diferente fundashon ta risibí supsidio di gobièrnu i no ta kumpliendo ku e tareanan pa kua nan ta risibí supsidio.
Minister Marilyn Alcalá-Wallé a hasi un apelashon na tur e fundashonnan pa yuda gobièrnu pensa konhuntamente riba posibel solushon i strategia pa nos por funshoná i hasi e trabounan den un mihó kuadro, baha gastu i kumpli ku reglanan pa risibí supsidio i e responsabilidat mará na dje.
Direktor di Maneho di Ministerio di ESKD sra. Susan Larmonie-van Heydoorn i Direktor interino di Sektor di Enseñansa i Siensia sr. Wladimir Kleinmoedig a tene e presentashon. A duna un bista general di repartishon di e presupuesto di e Ministerio kaminda por a mira ku e porsentahe di supsidio repartí bou di kada grupo di fundashon.
Esaki tabata e promé seshon informativo kaminda Ministerio di ESKD duna un bista general. Den e próksimo seshonnan ta sigui ku diálogo ku e fundashonnan pa asina yega na un trayekto kaminda e fundashonnan mes ta bin ku sugerensia i posibel solushon pa mehorá e funshonamentu di e area aki i tambe tene kuenta ku e situashon finansiero prekario di pais.
Ku esaki Ministerio di Enseñansa, Siensia, Kultura & Deporte ta duna inisiativa na un siklo informativo i partisipativo ku ta hiba na un kanal komunikativo entre gobièrnu i su stakeholdersnan.
—
KOMUNIKASHON