Publiká riba 19 Ougùstùs 2021
WILLEMSTAD – Inspektor di Impuesto sra. Jamila Isenia a informá na komienso di aña ku lo kuminsá prosesá “aanslag 2019” na final di mart 2021 por medio di un plataforma nobo di IT.
Meta di e sistema nobo ta pa hasi posibel ku por pone aanslag di forma outomátiko. Esaki ta pone ku por tin hopi punto di kontrol i validashon.
E trabou di prosesá ‘aanslag 2019’ a kuminsá manera planeá, pero debí na ‘lockdown’, mudansa di ofisina di Inspekshon di Impuesto pa WTC i tambe algun fayo den e plataforma nobo di IT, e proseso a kana mas poko poko ku kustumber.
Awor akí ta poniendo ‘aanslag’ di forma manual, di kual un porsentahe chikitu di forma outomátiko.Señora Isenia ta enfatisá ku e meta ta pa sigui prosesá aangifte 2019 di forma manual i automátiko durante lunanan di sèptèmber te ku desèmber 2021. Mientrastantu ta sigui hasi adaptashon na e sistema pa drecha sierto fayo-, puntonan di kontrol i di validashon. Di e forma akí por logra ku mas tantu posibel por outomatisá prinsipalmente e sistema di pone ‘aanslag’.
