Notisia

Willemstad – Ministerio di Tráfiko, Transporte i Planifikashon Urbano, den forma di Servisio di Outoridat di Aviashon Sivil di Kòrsou a duna inisio, awe 2 di sèptèmber 2019, na e auditoria di “ International Civil Aviation Organization” (ICAO). Esaki a tuma lugá dor  Minister di Tráfiko, Transporte i Planifikashon Urbano sra. Zita Jesus-Leito, dor di un seremonia na departamentu di Outoridat di Aviashon Sivil di Kòrsou. 

International Civil Aviation Organization (ICAO) ta e outoridat Internashonal di aviashon establesé dor di Nashon Uni for di 1944.  Su tarea prinsipal ta maneho di atministrashon i salbaguardiá e Konvenio Internashonal, di Aviashon Sivil (Chicago Convention).

Na 2018 ICAO a tuma e desishon pa bin hasi auditoria di pais Kòrsou, ku ta forma parti di Reino Hulandes. E meta prinsipal di e auditoria aki ta pa wak si Outoridat di Aviashon Sivil di Kòrsou ta kumpli ku su tareanan segun e Konvenio Internashonal di Aviashon Sivil establesé.

E delaster biaha ku pais Kòrsou a pasa den un auditoria asina aki tabata na 2008.

E Auditoria aki lo bai ta riba e 17 di e 19 Anexonan di ICAO i ta konsentrá riba e siguiente aspektonan;

• Leinan i reglanan lokal tokante aviashon sivil,

• Kon Outoridat di Aviashon Sivil di Kòrsou ta funshoná,
• Kualifikashon di e personal ,
• Supervishon riba nos airopuerto, tráfiko aéreo, kompanianan lokal di aviashon,
• Otorgámentu di pèrmitnan i brevet,
• Supervishon riba maneho di transporte di produktonan peligroso.

E auditoria di ICAO aki ta hopi importante, paso ku esaki Kòrsou ta haña un bon bista kiko tur nos a logra den e último añanan ku ta kumpli ku e stándartnan internashonal i kon leu nos ta pa yega na un nivel haltu pa ku e otro partinan ku nos mester kumpli kuné.

Ta normal ku den tur auditoria ta haña asina yama “observations” i “findings”. Esakinan ta enserá ku tin algun kosnan ku lo mester atendé kuné ainda. E auditoria ta parti di un programa di ICAO pa asina logra ku paisnan rònt mundu ta kumpli i keda kumpli ku stándart internashonal di seguridat di aviashon sivil.

MAS NOTISIA

Ministerio konserní: Tráfiko, Transporte i Planifikashon Urbano