Publiká riba 03 Mei 2024
WILLEMSTAD – Den kurá di eskultura botániko di Museo di Kòrsou, riba djaweps 2 di mei 2024 a tuma lugá inougurashon di eksposishon di obranan di arte di Mac Alberto. For di añanan 80 e artista a krea eskultura, kuminsando ku su promé opheto grabá den tronkon di un palu dilanti di Palasio di Gobernador na 1981. Komo ku dos di e palunan ku eskultura situá banda di Palasio di Gobernador ya pa basta tempu a muri, Gabinete di Gobernador di Kòrsou a tuma e inisiativa pa remplasá e palunan akí. Den estrecho kolaborashon ku Museo di Kòrsou, a pèrkurá kuidadosamente pa konservá e obranan di arte.
E dos tronkonnan akí, huntu ku un kolekshon di potrèt di otro obranan di arte di Mac, akompañá pa splikashon dje obranan i ku informashon di fondo di e artista mes, a haña un hogar nobo den e kurá di eskultura botániko di museo. Ku esaki ta rekonosé Mac Alberto komo un artista outodidakto di Kòrsou, di ken su trabou tin un impakto duradero den espasio públiko.
Manager di Museo di Kòrsou, señora Judaline Cijntje, a habri e seremonia ku palabranan di bon biní na tur invitado. Seguidamente direktor di Gabinete di Gobernador di Kòrsou, señor Peter Benschop a duna un splikashon kòrtiku di e motibu di e proyekto. Gobernador di Kòrsou, Su Ekselensia Lucille George-Wout, simbólikamente a revelá e palunan trasladá. Ku esaki ofisialmente a habri e eksposishon. Miembronan di famia di e artista i otro invitadonan a asistí na e seremonia di apertura akí.
Entrante djabièrnè 3 di mei, tur persona ta bon biní pa bishitá e eksposishon durante oranan di apertura di Museo di Kòrsou, kual ta djamars te ku djabièrnè di 8:30’or di mainta pa 4:30’or di atardi i djasabra di 10’or di mainta te 4’or di atardi.
